თემურ ქათამაძეს მოქალაქეობაზე უარს ეუბნებიან, რუსეთის 10 ათასზე მეტი მოქალაქე კი მოქალაქეობას იღებს, ამის შესახებ ბრიფინგზე ნიკა ქაშიბაძემ განაცხადა. “ნაციონალური მოძრაობის” წევრის თქმით, ბათუმის აქციების სიმბოლო ზეწოლის ქვეშაა.
ოპოზიციის ინფორმაციით, მიუხედავად იმისა, რომ თემურ ქათამაძე კანონის მიხედვით, ყველა საჭირო კრიტერიუმს აკმაყოფილებს მას მოქალაქეობაზე უარს დაუსაბუთებლად ეუბნებიან.
„ბათუმელი მედროშის და ბათუმის პროტესტების ერთ-ერთი სიმბოლო, ბატონი თემურ ქათამაძე, აღნიშნული დროისთვის განიცდის არნახულ ზეწოლას. ჯერ უკანონოდ დააკავეს აქციაზე, ხოლო შემდეგ, განთავისუფლების შემდეგ, ისევ დააბრუნეს საკანში. ამ პერიოდში, 2022 წლის 1 იანვრიდან 2024 წლის 31 ოქტომბრამდე, სახელმწიფო სერვისების განვითარების სააგენტოს მიერ საქართველოს პრეზიდენტის ადმინისტრაციაში საქართველოს მოქალაქეობის მინიჭების შესახებ 10 834 დადებითი დასკვნა გადაიგზავნა, რომელთა უმრავლესობა რუსეთის მოქალაქეები იყვნენ. ბატონი თემურ, მიუხედავად იმისა, რომ აკმაყოფილებს ყველა კრიტერიუმს საქართველოს ორგანული კანონის მიხედვით, ფლობს ქართულ ენას, იცის საქართველოს ისტორია და გააჩნია კულტურული კავშირები საქართველოსთან, მისი საკითხი უკვე წლებია გადაუწყვეტელია. ეს სხვა არაფერია, თუ არა ანტისახელმწიფოებრივი ქმედება, როცა ათასობით რუსეთის მოქალაქეს აძლევენ მოქალაქეობის სტატუსს, ხოლო იმათ, ვინც თავს ქართველად თვლის და ამ ქვეყნის ევროპულ მომავალს უჭერს მხარს, ქვეყნიდან აძევებენ,” – განაცხადა ნიკა ქაშიბაძემ ბრიფინგზე.
ინფორმაციისთვის: თემურ ქათამაძე, ბათუმის აქციების ერთ-ერთი სიმბოლო, რომელიც თავდაპირველად ადმინისტრაციულად იყო დაკავებული, გათავისუფლებიდან რამდენიმე წუთში იგი კვლავ დააკავეს. თემურ ქათამაძე მუჰაჯირების შთამომავალია და უკვე რამდენიმე წელია საქართველოს მოქალაქეობის მიღებას უშედეგოდ ცდილობს. ამჟამად იგი საქართველოში ცხოვრობს.
ცნობისთვის: 11 იანვარს, ქათამაძე დააკავეს საკონსტიტუციო სასამართლოსთან, ის დაადანაშაულეს პოლიციელის მოთხოვნისადმი დაუმორჩილებლობაში. დაკავების შემდეგ თემურ ქათამაძე აცხადებდა, რომ პოლიციელების მხრიდან მას შეურაცხყოფა მიაყენეს, გარდა ამისა, აღნიშნავდა, რომ პოლიციის შენობაში მას უთხრეს: „არ ხარ საქართველოს მოქალაქე, შენს ქვეყანაში წადიო“.
