აჭარის მთავრობის ადმინისტრაციასთან თვითდასაქმებულების მორიგი საპროტესტო აქცია გაიმართა. აქციის მონაწილეები აცხადებენ, რომ უკვე ერთ თვეზე მეტია პასუხს ელოდებიან კითხვაზე, ექნებათ თუ არა შესაძლებლობა ეკონომიკური საქმიანობის გაგრძელების.
მათი თქმით, მიუხედავად არაერთი მცდელობისა, მათთან შეხვედრას არც ბათუმის მერიის და არც აჭარის მთავრობის წარმომადგენლები თანხმდებიან, რის გამოც გაურკვევლობაში რჩებიან – შეძლებენ თუ არა მიმდინარე ტურისტულ სეზონზე ვაჭრობის გაგრძელებას.
საუბარია ბათუმის ბულვარსა და ქალაქის შემოსასვლელში წლების განმავლობაში სუვენირებით მოვაჭრე პირებზე, რომელთა ჯიხურები მუნიციპალურმა ინსპექციამ აიღო. თვითდასაქმებულები აღნიშნავენ, რომ კონსტრუქციების დემონტაჟამდე მათ იჯარის ხელშეკრულებების გაგრძელების მოთხოვნით შესაბამის უწყებებს წერილობით მიმართეს, თუმცა პასუხი ვერ მიიღეს.
აქციის მონაწილეები გადაწყვეტილებას უსამართლოდ მიიჩნევენ და აცხადებენ, რომ საქმიანობის შეწყვეტა მათ სოციალურ მდგომარეობას მნიშვნელოვნად აზარალებს.
ცნობისთვის, ბათუმის მუნიციპალური ინსპექცია ქალაქის მასშტაბით უნებართვო ობიექტების დემონტაჟს ახორციელებს. უწყებაში განმარტავენ, რომ აღნიშნული გადაწყვეტილება კონსტრუქციების უსახურობასა და ქალაქის იერსახის მოწესრიგების აუცილებლობას უკავშირდება.
