ბათუმში, მუნიციპალური ავტობუსები მუშაობას ღამის მატარებლის ჩამოსვლამდე, ნახევარი საათით ადრე ასრულებენ, შესაბამისად ტურისტულ ქალაქში გადაადგილების ერთადერთ საშუალებად ტაქსი რჩება.
ბათუმის მცხოვრებლებსა და სტუმრებს რკინიგზის სადგურის მიმდებარედ არსებულ გაჩერებასთან უშედეგო ლოდინი უწევთ.
გარეჩერება, რომელიც საერთაშორისო მნიშვნელობის მაგისტრალზეა არარსებობს მოსაცდელი და განრიგის მაჩვენებელი ტაბლო. მგზავრები რამდენიმეწუთიანი ლოდინის შემდეგ ინფორმაციის მიღებას ცხელი ხაზის მეშვეობით ცდილობენ, თუმცა ყურმილს არავინ იღებს.
მგზავრებს ლოდინი, მათ შორის წვიმიან ამინდში, რაც ბათუმისთვის დამახასიათებელია ღია ცის ქვეშ უწევთ. ამ გარემოებას ემატება ზღვის სანაპიროზე არსებული ქარიც.
ღამით მუნიციპალური ტრანსპორტის არარსებობის გამო, ბათუმში ჩამოსვლა სულ მცირე, 15 ₾არი ღირს.
მაშინ, როცა ტურიზმისა და კურორტების დეპარტამენტი მილიონებს რეგიონის რეკლამირებაში ხარჯავს, ამის პარალელურად ბათუმის მერია ვიზიტორებს ელემენტარულ გადაადგილების საშუალებას ვერ სთავაზობს.
“როგორც ჩვენთვის ცნობილია, ამ ეტაპზე მოთხოვნა ღამით მუნიციპალური ტრანსპორტის მუშაობასთან დაკავშირებით ავტოტრანსპოტის სააგენტოს არ გააჩნია. არც ტურიზმის დეპარტამენტთან გაჟღერებულა მსგავსი მოთხოვნა ტურისტების მხრიდან. შესაბამისად, მოთხოვნის გაჩენის შემთხვევაში, როგორც ავტოტრასპორტიდან გვაცნობეს მზად არიან მსგავსი საკითხი განიხილონ და საჭიროების შემთხვევაში გადაწყვეტილებაც მიიღონ,”- განუცხადეს “AJARATIMES.GE-ის ტურიზმის დეპარტამენტში.
რატომ არ მუშაობს ღამის მატარებლის ჩამოსვლამდე მუნიციპალური ავტობუსი? კითხვით შპს “ბათუმის ავტოტრანსპორტის” ადმინისტრაციას მივმართეთ. ორგანიზაციაში ამის მიზეზად მიმართვის არარსებობა დაასახელეს.
“მგზავრებს არ მოუმართავთ ამ პრობლემის შესახებ. აუცილებლად ვიფიქრებთ ამ საკითხზე და უახლოეს მომავალში იქნება ავტობუსი,” – განუცხადეს AJARATIMES.GE-ის ბათუმის ავტოტრანსპორტში.
აქვე დაგაინტერესებთ: გახშირებული ავარიები და მუნიციპალური ავტობუსის კანონდამრღვევი მძღოლები
წარწერები მუნიციპალური ავტობუსის კედლებსა და სკამებზე
