საქართველოს ენერგეტიკისა და წყალმომარაგების მარეგულირებელმა კომისიამ დღეს გამართულ სხდომაზე ელექტროენერგიის ტარიფების ცვლილებების 3 თვით გადავადების გადაწყვეტილება მიიღო.
სემეკის თავმჯდომარის, დავით ნარმანიას განცხადებით, ტარიფების გადახედვის პროცესის გადავადების თხოვნით კომისიას ელექტროენერგიის გამანაწილებელმა კომპანიებმა მიმართეს. მისივე განმარტებით, ბუნებრივ აირზე ტარიფების ზრდა არ იგეგმება და არსებული ტარიფები შენარჩუნდება.
დავით ნარმანიას თქმით, კომისია ბოლო დღეების განმავლობაში ინტენსიურად მუშაობდა სატარიფო საკითხებსა და ცალკეული დეტალების დაზუსტებაზე. ამასთან, გაიმართა კონსულტაციები საქართველოს პრემიერმინისტრთან.
„ამ ეტაპზე დაზუსტებული არ არის ელექტროენერგიის ბალანსები და ის, როგორი იქნება მომდევნო წლის მოსალოდნელი გენერაცია. სწორედ ამიტომ, კომისია დღეს იმსჯელებს დროებითი ტარიფების დაწესებაზე, რაც გულისხმობს, რომ ელექტროენერგიის სექტორში მოქმედი ტარიფები მომდევნო სამი თვის განმავლობაში უცვლელი დარჩება,“ – განაცხადა ნარმანიამ.
მისივე თქმით, ბუნებრივ აირზე ტარიფების ზრდა ისედაც არ იყო დაგეგმილი და ამ მიმართულებით ცვლილებები არ მოხდება. ნარმანიამ ასევე აღნიშნა, რომ კონსულტაციები მთავრობასთან ბუნებრივი პროცესია, ვინაიდან ელექტროენერგეტიკის სექტორში რიგი საკითხები, მათ შორის ბალანსები, გენერაციის პროგნოზირება და ჰიდროსადგურების დერეგულირება, მთავრობის პრეროგატივას მიეკუთვნება და სემეკის გადაწყვეტილებებიც ამ მონაცემებზეა დაფუძნებული.
