აჭარის უმაღლესი საბჭოს თავმჯდომარემ გაეროს განვითარების პროგრამის ფარგლებში განხორციელებული პროექტების მიღწევებსა და შედეგებზე იმ შეხვედრისას ისაუბრა, რომელსაც ორგანიზაციის ხელმძღვანელი ესწრებოდა. მხარეებს შორის შეხვედრა წარმომადგენლობითი ორგანოს თავმჯდომარის კაბინეტში გაიმართა.
საუბრისას დავით გაბაიძემ აღნიშნა, რომ საბჭომ UNDP-ის ფინანსური დახმარებით, ინსტიტუციური გაძლიერების მიზნით არაერთი პროექტი განახორციელდა, მათ შორის შენობის სრულად ადაპტირება მოხდა. გამჭვირვალობისა და ხელმისაწვდომობის უზრუნველყოფის მიზნით კი, საბჭომ ჩართულობის ახალი სისტემა დანერგა, ასევე, შეიქმნა ახალი პორტალი და მოქალაქეთა მიღების ცენტრი.
შეხვედრის შემდეგ დავით გაბაიძემ დაგლას უების შენობა დაათვალიერებინა. გაეროს განვითარების პროგრამის ხელმძღვანელი მოქალაქეთა მიღების ცენტრის მუშაობის სპეციფიკასაც გაეცნო.
“ჩვენ მიმოვიხილეთ ის შედეგები, რომელიც აჭარის უმაღლეს საბჭოს გააჩნია ღია მმართველობის კუთხით და გაეროს განვითარების პროგრამის დახმარებით. ვისაუბრეთ მოქალაქეთა ჩართულობის საკითხებზე, უმაღლესი საბჭოს გამჭვირვალობაზე, ვისაუბრეთ იმ შედეგებზე, რომელიც ჩვენთვის საამაყოა. ამ პროექტის შემდეგომ გაიზარდა მოქალაქეთა ჩართულობა. ასევე, ვისაუბრეთ სამომავლო თანამშრომლობის გზებზე, სად შეიძლება კიდევ მეტად გაძლიერდეს უმაღლესი საბჭოს საქმიანობა,” – განაცხადა დავით გაბაიძემ.
„აჭარის უმაღლესი საბჭოს პროგრესი ინსტიტუციური გაძლიერების თვალსაზრისით, მისასალმებელია, პროგრესია მოქალაქეთა ჩართულობის, ღიაობისა და გამჭვირვალობის მიმართულებითაც, რაც ძალზე მნიშვნელოვანია“, – განაცხადა დაგლას უებმა.
