თინა დიასამიძეს, რომელიც 150-მდე მიუსაფარ ცხოველზე ზრუნავს ბათუმის მუნიციპალურმა ინსპეციამ თავშესაფრის დემონტაჟი მოსთხოვა. შესაბამისი უწყება ცხოველთადამცველს უკვე მიუვიდა. ქალმა საკუთარი ძალებით ბათუმში, აეროპორტის მიმდებარედ, თავისუფალ ტერიტორიაზე მიუსაფრებისთვის პატარა სახლების ჩადგმა ერთი წლის წინ დაიწყო.
თინა დიასამიძე ქუჩიდან აყვანილ ცხოველებს აპურებს, მათზე ზრუნავს და საჭიეროების შემთხვევაში სამედიცინო მომსახურებასაც უწევს. ამ ყველაფერს, როგორც თავად ამბობს, ცხოველთმოყვარულების ფინანსური დახმარებით ახერხებს.
“მოვიდნენ და ჩემი აგებული მცირე, არაკაპიტალური შენობების დემონტაჟი მომთხოვეს. ვიღაცის საჩივრის საფუძველზე, ვის ინტერესებში შეიძლება შედიოდეს ეს არ ვიცი. ჩემი თავშესაფარი არის წითელ ზონასთან (აეროპორტის ასაფრენ ბილიკთან) შესაბამისად, აქ საინვესტიციო ადგილი არაა და ვერც სამომავლოდ იქნება. სად უნდა წავიდე ამდენ ცხოველთან ერთად არ ვიცი. მე ხომ ამ ყველაფრის აგებაში და შექმნაში ძალიან დიდი შრომა ჩავდე. ნუთუ მერიამ არ უნდა დაინახოს ამხელა სიკეთე? ამდენ ცხოველს ვუვლი უსასყიდლოდ და სახელმწიფოს ტვირთად არ აწვება,” – უთხრა AJARATIMES.GE-ის თინა დიასამიძემ.
ბათუმის მერიის მუნიციპალურ ინსპექციაში გვითხრეს, რომ მოქალაქის ოფიციალური საჩივრის საფუძველზე დაიწყო აღნიშნულ ობიექტზე სამშენებლო საქმის წარმოება, უნებართვო მშენებლობის ფაქტზე, თუმცა უწყებაში არ განმარტეს საჩივარს საფუძვლად რა უდევს.
