ქედლებში სათხილამურო სეზონი გაიხსნა, ამის შესახებ AJARATIMES.GE-ის ხულოს მერიაში განუცხადეს. უწყებაში განმარტავენ, რომ ბაზაზე მოწყობილია ბიგელის ტიპის საბაგირო, ასევე, სპორტსმენები უზრუნველყოფილი არიან სათხილამურო სამოსითა და აღჭურვილობით. საბაგიროს სიგრძე 180 მეტრს შეადგენს. ამ ეტაპზე წვრთნებს 45 სპორტსმენი გადის.
მერიის ცნობით, 2022 წელს, უმცროს ასაკთა შორის, ადგილობრივი ნატა მეხეშიძე საქართველოს თასის მფლობელი გახდა. 2022-2023 წლებში კი საქართველოს თასი მარი ჩოგაძემ მოიგო.
ინფორმაციისთვის: სამთო-სათხილამურო ტურიზმის მოყვარულთათვის მიმზიდველია ზამთრის კურორტი ქედლები, რომელიც ბათუმიდან 90 კილომეტრის დაშორებით მდებარეობს. იგი ზღვის დონიდან 1.500 მეტრის სიმაღლეზეა. ქედლებში უმაღლესი მწვერვალი “გოგური” 1.692 მეტრის სიმაღლეზე მდებარეობს. აქ მაქსიმალური ტემპერატურა ზამთარში 10oC-ია.
