ქობულეთის სანაპირო ზოლში, ქარსაცავ ზონაში მრავალწლიანი ფიჭვების გაჩეხვის ფაქტზე ამ დრომდე არავინ დაჯარიმებულა, უფრო მეტიც, შესაბამის უწყებებს მოკვლევაც კი არ დაუწყიათ. ინფორმაცია „აჭარა თაიმსისთვის“ გახდა ცნობილი.
ქობულეთის მერიაში და გარემოსდაცვითი ზედამხედველობის დეპარტამენტში განმარტავენ, რომ გაჩეხილი ხეები კერძო საკუთრებაში არსებულ ტერიტორიაზე იყო, რის გამოც, მათი თქმით, კანონის ფარგლებში რეაგირების შესაძლებლობა არ გააჩნიათ.
ფიჭვები გაჩეხეს როგორც ქობულეთის მერის კაბინეტიდან რამდენიმე მეტრში, ასევე, უშუალოდ საკურორტო ზოლშიც. რეკრეაციული სივრცის შემცირების ხარჯზე ტერიტორია სავარაუდოდ, საინვესტიციოდ მზადდება.
„ქობულეთის მერიის გვერდით, კერძო საკუთრებაში არსებულ მიწის ნაკვეთზე ხის მოჭრის ფაქტზე, მუნიციპალიტეტი ვერ განახორციელებს რეაგირებას. ხეების მოჭრის საკითხთან დაკავშირებით, მესაკუთრის განცხადების შესწავლის შემდგომ დადგინდა, რომ ხეები განლაგებული იყო კერძო საკუთრებაში, იყო საფრთხის შემცვლელი და მეპატრონე ხეების მოჭრის შემთხვევაში შეძლებდა ტრანსპორტირებას. აღმაშენებლის გამზირი N 512-516 არსებულ ნარგავებთან დაკავშირებით, კი მესაკუთრემ მოგვმართა. შესწავლის შემდგომ დადგინდა, რომ ხეები განლაგებულია კერძო საკუთრებაში, აღნიშნული ნაკვეთი წარმოადგენს ლანდშაფტურ ზონას, შესაბამისად ჩვენ არ დავრთეთ ნება ხეების ტრანსპორტირებაზე,” – წერილობით გვიპასუხეს ქობულეთის მერიიდან.
ეს პირველი შემთხვევა არ არის, როდესაც ქობულეთში, განსაკუთრებით სანაპირო ზოლში, უნიკალურ ფიჭვებს ჭრიან. მერია მსგავს შემთხვევებში პასუხისმგებლობას ირიდებს, უფრო მეტიც, პროცესს არ ეწინააღმდეგება. ასე მოხდა, საპატრიარქოს კუთვნილ ტერიტორიაზე, რომლის შესახებაც „აჭარა თაიმსი“ წერდა.
კერძო მესაკუთრეს აქვს უფლება ხეები მოჭრას – ქობულეთის მერის მოადგილე ფიჭვების გაჩეხვის ფაქტზე
საგულისხმოა ის გარემოება, რომ ფიჭვები, რომლებსაც წლების განმავლობაში ადგილობრივები ჭრიან, ვიზუალურად ჯანსაღად გამოიყურება. მიუხედავად ამისა, კერძო პირების მიერ, მერიისთვის წარდგენილი შესაბამისი დასკვნების საფუძველზე ისინი „არაჯანსაღად“ ფასდება, რაც ჭრის ნებართვის გაცემის საფუძველი ხდება.
ფაქტია, რომ ქობულეთის სანაპირო ზოლი, რომელიც მრავალწლიანი ფიჭვებით გამოირჩევა, თანდათან ბეტონით იცვლება. როგორც ჩანს, ადგილობრივთა დიდი ნაწილი უნიკალურ ბუნებაზე მეტად მატერიალურ სარგებელს ანიჭებს უპირატესობას.
» გაკვეთილი, რომელიც ვერ ვისწავლეთ: მეწყრები და დაკარგული სიცოცხლეები
