შინაგან საქმეთა სამინისტროს ინფორმაციით, ცენტრალური კრიმინალური პოლიციისა და თბილისის პოლიციის დეპარტამენტების თანამშრომლებმა, გენერალურ პროკურატურასთან ერთად ჩატარებული ოპერატიული ღონისძიებებისა და საგამოძიებო მოქმედებების შედეგად, „ქურდულ სამყაროსთან“ კავშირში მყოფი 44 პირი დააკავეს.
როგორც ცენტრალური კრიმინალური პოლიციის დეპარტამენტის დირექტორმა, დავით კიკნაძე ბრიფინგზე განაცხადა, კიდევ 7 პირს ბრალი წარედგინა, ნაწილს პენიტენციურ დაწესებულებაში, ნაწილს კი დაუსწრებლად, მათ შორის საზღვარგარეთ მყოფ ორ ე.წ. „კანონიერ ქურდს“ ლევან მარღია და ნოდარ შუკაკიძე.
გამოძიების ინფორმაციით, ბრალდებულები ე.წ. ქურდულ გარჩევებს აწყობდნენ და მოქალაქეებს შორის არსებულ ფინანსურ თუ კრიმინალურ დავებზე „ქურდულ გადაწყვეტილებებს“ იღებდნენ. შსს-ს ცნობით, აღნიშნული სქემის ფარგლებში მოქალაქეებს თანხის გადახდას აკისრებდნენ, მოთხოვნების შეუსრულებლობის შემთხვევაში კი ფიზიკური ანგარიშსწორებითა და სიცოცხლის მოსპობით ემუქრებოდნენ.
უწყების განცხადებით, გამოძიებით ასევე დადგინდა, რომ დანაშაულებრივი ჯგუფის წევრები წინასწარ შემუშავებული გეგმით მოქმედებდნენ, გადაადგილდებოდნენ თბილისის სხვადასხვა უბანში, არჩევდნენ კონკრეტულ პირებს და მათი ნების საწინააღმდეგოდ ინტერნეტბანკის საშუალებით სესხების გააქტიურებას აიძულებდნენ, რის შემდეგაც თანხებს საკუთარ ანგარიშებზე ირიცხავდნენ.
სამართალდამცველების ინფორმაციით, ბრალდებულები ე.წ. კანონიერ ქურდებს პერიოდულად აწვდიდნენ ინფორმაციას იმ პირების შესახებ, რომელთაგან შემდგომში შესაძლებელი იქნებოდა ფულის გამოძალვა და მატერიალური სარგებლის მიღება „ქურდული სამყაროს“ სახელით.
ჩატარებული ჩხრეკების შედეგად ამოღებულია მობილური ტელეფონები, კომპიუტერული ტექნიკა და ცეცხლსასროლი იარაღები. გამოძიება საქართველოს სისხლის სამართლის კოდექსის 223-ე პრიმა, 223-ე ტერცია, 223-ე კვარტა და 236-ე მუხლებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.
