ფოტო: პაციენტის და და მამა
2024 წლის სექტემბერში, მარი ანანიძემ ბათუმში, ხოზრევანიძის კლინიკაში ცხვირის გეგმიური ოპერაცია ჩაიტარა, რომელიც პოლიპების ამოღებას, ხრტილის გასწორებასა და რინოპლასტიკას მოიცავდა. ოპერაციის საწყის ეტაპზე კი ახალგაზრდა ქალი კომატოზურ მდგომარეობაში ჩავარდა და ამ დრომდე რთულ მდგომარეობაში რჩება.
კუზანოვის კლინიკის წარმომადგენლობა ხოზრევანიძის კლინიკაში იყო წარმოდგენილი, სადაც პაციენტებს იღებდნენ.
ოჯახის ინფორმაციით, პაციენტს ოპერაციამდე ყველა საჭირო სამედიცინო კვლევა ჩაუტარდა. მათივე თქმით, ოპერაციამდე სამი დღით ადრე ჩატარებული ანალიზების საფუძველზე, მარი ანანიძე ჯანმრთელად მიიჩნიეს და ქირურგიული ჩარევისთვის მზად იყო.
ანანიძეების თქმით, პაციენტს გული გაუჩერდა, თუმცა მომხდარის შესახებ ოჯახს მხოლოდ რამდენიმე საათის შემდეგ აცნობეს.
ოპერაციის შემდეგ მარი ანანიძე ხოზრევანიძის კლინიკაში დაახლოებით ექვსი თვის განმავლობაში მკურნალობდა, თუმცა მისი მდგომარეობა არ გაუმჯობესდა. ამის შემდეგ ოჯახმა პაციენტის სტამბოლში გადაყვანის გადაწყვეტილება მიიღო, სადაც მკურნალობის კურსის დასრულების შემდეგ იგი სახლში, ოჯახის პირობებში აგრძელებს რეაბილიტაციას.
ოჯახის განცხადებით, რეაბილიტაციის პროცესი მნიშვნელოვან ფინანსურ რესურსებს მოითხოვს. მათივე ინფორმაციით, ხოზრევანიძის კლინიკამ გარკვეული ფინანსური დახმარება გასწია სამედიცინო ხარჯების დასაფარად.
ამ ეტაპზე ანანიძეების ოჯახი კომპენსაციას კუზანოვის კლინიკისგან ითხოვს. მათი მტკიცებით, პაციენტის მძიმე მდგომარეობა ექიმების შესაძლო დაუდევრობის შედეგია.
ოჯახი აღნიშნავს, რომ კლინიკასთან დაკავშირებას არაერთხელ ცდილობდნენ როგორც სატელეფონო კომუნიკაციით, ისე სოციალური ქსელების საშუალებით, თუმცა მათი თქმით, კონტაქტის დამყარება ვერ შეძლეს.
„აჭარა თაიმსი“ საკითხთან დაკავშირებით კუზანოვის კლინიკას დაუკავშირდა, თუმცა ორდღიანი ლოდინის მიუხედავად, სამედიცინო დაწესებულების წარმომადგენლებმა კომენტარი არ გააკეთეს.
