ინფექციონისტი მაია ბუწაშვილი გრიპის ვირუსის წლევანდელ შტამთან დაკავშირებით გავრცელებულ მითებსა და ვაქცინის ეფექტურობაზე არსებულ სკეპტიციზმს ეხმაურება. მისი განმარტებით, საზოგადოებაში არასწორად ვრცელდება ინფორმაცია, თითქოს გრიპის საწინააღმდეგო ვაქცინამ „არ იმუშავა“, რაც რეალობას არ შეესაბამება.
ბუწაშვილის თქმით, მიმდინარე სეზონზე წამყვანი შტამი არის H3N2 subclade K და არა ე.წ. „ღორის გრიპი“ (H1N1), როგორც ამას ხშირად აცხადებენ. მიუხედავად იმისა, რომ H1N1 ქვეტიპიც ცირკულირებს, წლევანდელი ეპიდემიოლოგიური სურათის მთავარი განმსაზღვრელი სწორედ H3N2-ია.
ინფექციონისტის განმარტებით, ვაქცინის შედარებით დაბალი ეფექტურობა იმით არის განპირობებული, რომ გრიპის ვირუსმა მუტაცია უკვე მას შემდეგ განიცადა, რაც სეზონური ვაქცინა შემუშავებული იყო. როგორც ცნობილია, გრიპის ვაქცინა ყოველწლიურად იმ ქვეტიპებზეა მორგებული, რომლებიც პროგნოზულად უნდა გავრცელდეს სეზონის განმავლობაში. სწორედ ამ მუტაციამ შეამცირა ვაქცინის დაცვითი უნარი, თუმცა ეს არ ნიშნავს, რომ ვაქცინაცია უშედეგოა.
მაია ბუწაშვილის განცხადებით, მიმდინარე წელს ვაქცინაციას კიდევ უფრო დიდი მნიშვნელობა აქვს, რადგან H3N2-ის ახალმა ქვეტიპმა ნაწილობრივ „გააღწია“ როგორც ვაქცინით, ასევე წინა ინფიცირებით ჩამოყალიბებულ იმუნურ პასუხს. მისი თქმით, ამ გარემოებამ გარკვეულ ეტაპზე პანდემიური მიმდინარეობის პროგნოზებიც კი გააჩინა, თუმცა ამ ეტაპზე ასეთი სცენარი ნაკლებად მოსალოდნელია.
ინფექციონისტი აღნიშნავს, რომ მიუხედავად იმისა, აცრილი ადამიანებიც ინფიცირდებიან, სტატისტიკა აჩვენებს მკაფიო განსხვავებას დაავადების სიმძიმეში. როგორც საერთაშორისო მონაცემებით, ასევე ადგილობრივი დაკვირვებით, ვაქცინირებულ პირებში გრიპი უმეტეს შემთხვევაში მსუბუქად მიმდინარეობს, მაშინ როცა აუცრელებში ხშირია 5–7 დღის განმავლობაში მაღალი და შეუპოვარი ცხელება, ასევე სხვადასხვა გართულებები. აცრილებში მნიშვნელოვნად ნაკლებია ჰოსპიტალიზაციის შემთხვევებიც.
მაია ბუწაშვილი საზოგადოებას მოუწოდებს, არ აყვეს ვაქცინის წინააღმდეგ მიმართულ კამპანიებს და ხაზგასმით აღნიშნავს, რომ ვაქცინაციას წელსაც აქვს აზრი. მისი თქმით, ვინც ჯერ არ აცრილა, ვაქცინაციის ჩატარება კვლავ რეკომენდებულია, რადგან იგი დაავადების მძიმე მიმდინარეობისა და გართულებებისგან დაცვის ერთ-ერთ ყველაზე ეფექტურ საშუალებად რჩება.
