ხელვაჩაურის მუნიციპალიტეტში რამდენიმე თვის წინ მომხდარ შემთხვევაზე მოქალაქე „აჭარა თაიმსთან“ საუბრობს და აცხადებს, რომ პოლიციელები იმ ოქმზე ხელმოწერას სთხოვდნენ, რომლის შინაარსი არ წააკითხეს.
მისი თქმით, პოლიციელები სახლში მივიდნენ უკვე შედგენილი ოქმით და დოკუმენტზე ხელის მოწერას მუქარით აიძულებდნენ.
მოქალაქის ინფორმაციით, სწორედ ამ დროს, პოლიციელების თვალწინ, ყელზე ბასრი საგნით თვითდაზიანება მიიყენა. იგი სასწრაფო სამედიცინო დახმარების ჯგუფმა საავადმყოფოში გადაიყვანა. მისი თქმით, შემთხვევის შემდეგ არარსებული ბრალის აღიარება აღარ მოუთხოვიათ.
რესპონდენტი ასევე აცხადებს, რომ წარსულში ნასამართლევია და ციხიდან გათავისუფლების შემდეგ პოლიციელების მხრიდან მუდმივ ყურადღებასა და ზეწოლას განიცდის.
აღსანიშნავია, რომ მსგავსი ბრალდებები ხელვაჩაურის პოლიციის მისამართით სხვა მოქალაქეებმაც გააჟღერეს. გასულ კვირას პოლიციის შენობასთან გამართულ აქციაზე მონაწილეები ნარკოტიკისა და იარაღის შესაძლო „ჩადებასა“ და იძულებით აღიარებაზე საუბრობდნენ.
ხელვაჩაურის პოლიციის შენობასთან ადგილობრივებმა საპროტესტო აქცია გამართეს
რატომ ცდილობდნენ პოლიციელები ოქმზე ხელის მოწერას იძულებით და მუქარით – ამ კითხვით შინაგან საქმეთა სამინისტროს მივმართეთ. უწყების პასუხის მიღების შემთხვევაში მასალა განახლდება.
