ხელვაჩაურში, მერიის მიმდებარე ტერიტორიაზე მომხდარ ინციდენტს 27 წლის ახალგაზრდა კაცის სიცოცხლე ემსხვერპლა. “აჭარა თაიმსის” ინფორმაციით, შემთხვევას წინ კონფლიქტი და ურთიერთშელაპარაკება უძღოდა.
დაჭრილი ახალგაზრდა სასწრაფო დახმარების ექიმებმა სამედიცინო დაწესებულებაში გადაიყვანეს, თუმცა მისი გადარჩენა ვერ შეძლეს – დაჭრიდან რამდენიმე საათში იგი საავადმყოფოში გარდაიცვალა.
შსს-ს კომენტარი მკვლელობის მცდელობისა და განზრახ მკვლელობის ფაქტზე:
„შინაგან საქმეთა სამინისტროს მიერ ჩატარებული საგამოძიებო და ოპერატიული ღონისძიებების შედეგად, განზრახ მკვლელობის მცდელობის ბრალდებით ბათუმში დაკავებულია 1988 წელს დაბადებული ჯ.ბ. გამოძიებით დადგენილია, რომ ბრალდებულმა ყოფით ნიადაგზე წარმოშობილი დაპირისპირების შედეგად დანით სხეულზე ჭრილობები მიაყენა 1997 წელს დაბადებულ გ.ლ.-ს და 1998 წელს დაბადებულ ლ.ქ.-ს. შემთხვევის შედეგად გ.ლ. საავადმყოფოში მიყვანის შემდეგ გარდაიცვალა. ბრალდებული მალევე დააკავეს ცხელ კვალზე.
შინაგან საქმეთა სამინისტრო გამოძიებას სისხლის სამართლის კოდექსის 19-108-ე მუხლით აწარმოებს, რაც 7-დან 15 წლამდე თავისუფლების აღკვეთა ითვალისწინებს.“
ბოლო 24 საათში აჭარაში კიდევ ერთი ადამიანი მოკლეს.
