საქართველოს ფინანსთა სამინისტროს საგამოძიებო სამსახურის თანამშრომლებმა ხულოს მუნიციპალიტეტის მერიის წარმომადგენელი ქრთამის აღების ბრალდებით დააკავეს.
გამოძიების ინფორმაციით, დაკავებული პირი, რომელიც მუნიციპალიტეტის მიერ შესყიდული საქონლის ჩაბარებაზე და შესაბამისი დოკუმენტაციის გაფორმებაზე იყო პასუხისმგებელი, სახელმწიფო ტენდერში გამარჯვებული კომპანიის წარმომადგენლისგან ნაკლები რაოდენობის საქონელი ჩაიბარა, თუმცა მიღება-ჩაბარების აქტი სრულ მოცულობაზე შეადგინა და კომპანიას სრული სატენდერო თანხა გადაურიცხა.
საგამოძიებო სამსახურის ცნობით, აღნიშნული ქმედების სანაცვლოდ, ბრალდებულმა კომპანიის წარმომადგენლისგან ფულადი ჯილდო მოითხოვა და მიიღო, რის შემდეგაც იგი დააკავეს. სასამართლოს განჩინების საფუძველზე ჩატარებული ფარული საგამოძიებო მოქმედებების შედეგად მოპოვებულია აუდიო და ვიდეო მტკიცებულებები, რომლებიც დანაშაულის ფაქტს ადასტურებს.
საქმე აღძრულია საქართველოს სისხლის სამართლის კოდექსის 338-ე მუხლის პირველი ნაწილით – ქრთამის აღება, რაც 6-დან 9 წლამდე ვადით თავისუფლების აღკვეთას ითვალისწინებს.
