დღეს ოფიციალურად ამოიწურა აკაკი გვიანიძის მანდატის ვადა ბათუმის საკრებულოში. როგორც თავად გვიანიძე სოციალურ ქსელში წერს, მისთვის დიდი პატივი იყო ემსახურა ქალაქისა და ბათუმელების ინტერესებისათვის.
„დიდი პატივი იყო მემსახურა საკრებულოში ჩვენი ქალაქისა და თანაქალაქელების ინტერესების სასიკეთოდ, რისთვისაც მადლობას ვუხდი ამომრჩეველსა და გუნდს, რომელმაც ამის შესაძლებლობა მომცა“, – აღნიშნა გვიანიძემ.
მისივე თქმით, ამ ეტაპზე ის პარტიულ პოლიტიკასაც ემშვიდობება და პირადი განცხადების საფუძველზე ტოვებს საპარლამენტო სიას.
„ვაპირებ მეტი დრო დავუთმო სწავლის გაგრძელებასა და პედაგოგიურ საქმიანობას. წარმატებას ვუსურვებ იმ ადამიანებს, ვის გვერდითაც ამ წლების განმავლობაში ვიბრძოდი მართალი საქმისთვის,“ – წერს გვიანიძე.
აკაკი გვიანიძე ხაზგასმით აღნიშნავს, რომ მიუხედავად პოლიტიკიდან წასვლისა, რჩება აქტიურ მოქალაქედ და სამოქალაქო საზოგადოების ნაწილად.
