ქობულეთის მუნიციპალიტეტის სოფელ კვირიკეში, მეურნეობის დასახლებაში, ასევე ბობოყვათში მცხოვრებლები წლებია გზის, სასმელი წყლისა და გარეგანათების პრობლემების მოგვარებას ითხოვენ. მათი თქმით, არაერთი მიმართვის მიუხედავად, ადგილობრივი ხელისუფლებისგან კონკრეტული შედეგი დღემდე არ მიუღიათ.
როგორც ადგილობრივები „აჭარა თაიმსთან“ აცხადებენ, დასახლებამდე მისასვლელი საავტომობილო გზა არ არის მოასფალტებული, რის გამოც მსუბუქი ავტომობილებით გადაადგილება განსაკუთრებით რთულია. გზაზე მრავლადაა ორმოები, რომლებიც წვიმის შემდეგ წყლით ივსება და გადაადგილებას კიდევ უფრო ართულებს.
მოსახლეობის თქმით, ავარიული გზის გამო ტაქსის მძღოლებიც ხშირად უარს ამბობენ შეკვეთების შესრულებაზე, რადგან ავარიულ გზაზე მოძრაობა ავტომობილებს აზიანებს.
ადგილობრივების ინფორმაციით, აღნიშნული გზით ორი სოფლის 200-ზე მეტი ოჯახი სარგებლობს. მათი თქმით, განსაკუთრებით მძიმე მდგომარეობა უამინდობის დროს იქმნება, როდესაც გადაადგილება მნიშვნელოვნად ფერხდება.
პრობლემას ემატება ისიც, რომ გზაზე გარეგანათება არ არსებობს. მოსახლეობა ამბობს, რომ ღამის საათებში გადაადგილება დამატებით საფრთხეს წარმოადგენს, განსაკუთრებით იმ ადამიანებისთვის, რომლებიც სამსახურიდან გვიან ბრუნდებიან.
სოფელში კიდევ ერთი მწვავე პრობლემა სასმელი წყლის დეფიციტია. ადგილობრივების თქმით, ზაფხულის დადგომასთან ერთად წყლის მიწოდება პრაქტიკულად წყდება და მოსახლეობა იძულებულია წვიმის წყალი რეზერვუარებში შეაგროვოს, რათა ყოველდღიური საჭიროებები დაიკმაყოფილოს.
მოსახლეობა ამბობს, რომ წლების განმავლობაში გზის მოასფალტებას, წყლის სისტემის მოწესრიგებასა და გარეგანათების მოწყობას ითხოვს, თუმცა, მათი თქმით, დაპირებებს ძირითადად მხოლოდ წინასაარჩევნო პერიოდში ისმენენ, არჩევნების დასრულების შემდეგ კი მათ პრობლემებზე აღარავინ ზრუნავს.
„აჭარა თაიმსი“ აღნიშნულ საკითხზე კომენტარის მისაღებად ქობულეთის მუნიციპალიტეტის მერიას დაუკავშირდა, თუმცა უწყებაში მოსახლეობის მოთხოვნებთან დაკავშირებით განმარტება არ გააკეთეს.
დაკავშირებული თემები ⇓
ქობულეთის სანაპიროზე ფიჭვების გაჩეხვის გამო არავინ დაჯარიმებულა – უწყებებს მოკვლევაც არ დაუწყიათ
ქობულეთის საკრებულოს თავმჯდომარის სახლში არსებული უნებართვო ნაგებობა მერიამ დაანგრია
სუს-მა ქობულეთსა და ხულოში კორუფციული დანაშაულების ფაქტზე რამდენიმე პირი დააკავა
ქობულეთში ქრთამის აღების ბრალდებით დაკავებული პირის მეუღლე იჯარის კომისიის წევრი იყო
ქობულეთის მერიის თანამშრომლის საკუთრებაში არსებული ავტოსამრეცხაო მდინარეს აბინძურებს
