“აჭარა თაიმსის” წყაროს ინფორმაციით “ბათუმის წყლის” თანამშრომლებმა ფეკალური მასა მდინარე მეჯინისწყალში გადაღვარეს. მოქალაქემ ფაქტის ამსახველი ფოტო და ვიდეო მასალა გადაიღო. წყარო გვიყვება, რომ მდინარეში ფეკალური მასის გადაღვრის ეს პირველი შემთხვევა არ ყოფილა და ტერიტორიაზე ხშირად შეუნიშნავთ სპეცტექნიკა.
ფაქტი ბათუმში, ლორთქიფანიძის ქუჩაზე, ზღვიდან დაახლოებით ერთ კილომეტრში დააფიქსირეს. მდინარეში ფეკალური მასების ჩაღვრის ფაქტს “ბათუმის წყალში” კატეგორიულად უარყოფენ. კომპანიაში ჩვენს კითხვებს წერილობით უპასუხეს და განმარტეს, რომ სპეფტექნიკით მდინარეში სანიაღვრე არხიდან ამოტუმბული წყალი გადაღვარეს.
“აღნიშნული სპეცტექნიკა ემსახურება სანიაღვრე ქსელების გარეცხვა-გაწმენდით სამუშაოებს. ლორთქიფანიძის ქუჩაზე მიმდინარეობდა გაჭედილი ჭის გარეცხვა-გაწმენდითი სამუშაოები. სანიაღვრე ქსელის გამრეცხი მანქანის საშუალებით ამოიტუმბა სანიაღვრე წყალი. ქსელის გახსნამდე, ამოტუმბული სანიაღვრე წყლის დაცლა მოხდა მდინარეში გადაღვრის მეშვეობით. აღსანიშნავია, რომ ლორთქიფანიძის ქუჩაზე არსებული სანიაღვრე ქსელი მდინარე მეჯინას უერთდება. მდინარეში მოხდა სანიაღვრე წყლის ჩაღვრა, რომელსაც არ აქვს კავშირი კანალიზაციის მასასთან,” – აცხადებენ კომპანიაში.
