ბათუმში, წერეთლის ქუჩაზე 21 მარტს მომხდარი ავტოსაგზაო შემთხვევის შედეგად რამდენიმე ადამიანი დაშავდა, მათ შორის თამაზ ვანაძე მეუღლესთან ერთად. დაზარალებულის თქმით, შეჯახების შედეგად მან ტვინის შერყევა მიიღო, ხოლო მეუღლეს სხვადასხვა სახის ტრავა აღენიშნება.
პირველადი სამედიცინო დახმარების გაწევის შემდეგ ცოლ-ქმარი ბინაზე გაწერეს, თუმცა მათივე განცხადებით, მკურნალობის პროცესი კვლავ გრძელდება.
თამაზ ვანაძე ირწმუნება, რომ იმ პირმა, რომლის ბრალეულობაზეც გამოძიება მიმდინარეობს, სამედიცინო ხარჯების ნაწილი დაფარა, თუმცა მედიკამენტების შეძენასა და დამატებითი გამოკვლევების დაფინანსებაზე უარი განაცხადა. მისი თქმით, ჯანმრთელობის მდგომარეობის გადამოწმებას თურქეთში გეგმავენ, თუმცა ამისთვის საჭირო ფინანსები არ გააჩნიათ.
მისივე განცხადებით, მხარეებს შორის საუბარი სამედიცინო ხარჯების ანაზღაურების სხვადასხვა ვარიანტზე იყო, თუმცა შეთანხმება ვერ იქნა მიღწეული. დაზარალებულები ასევე აცხადებენ, რომ მათ მიმართ კომუნიკაცია არაჰუმანური ფორმით მიმდინარეობს, რაც მათ მდგომარეობას კიდევ უფრო ართულებს.
ავარიის ფაქტზე გამოძიება მიმდინარეობს და დანიშნულია შესაბამისი ექსპერტიზები. საქმეზე ამ ეტაპზე დამატებითი დეტალები ცნობილი არ არის.
სავარაუდო ბრალდებულმა კომენტარის გაკეთებაზე უარი განაცხადა, თუმცა „აჭარა თაიმსთან“ პირად საუბარში აღნიშნა, რომ დაზარალებულების ნათქვამი სიმართლეს არ შეესაბამება. ირწმუნება, რომ მან ყველა აუცილებელი სამედიცინო ხარჯი უკვე დაფარა და დამატებით კითხვებს სასამართლოში გასცემს პასუხს.
