შინაგან საქმეთა სამინისტროს ცნობით, არასრულწლოვნების ტრეფიკინგის ბრალდებით სამი პირი დააკავეს. დაკავებულებს შორის არიან როგორც საქართველოს, ისე უცხო ქვეყნის მოქალაქეები.
შსს-ის ინფორმაციით, გამოძიებით დადგინდა, რომ ბრალდებულებმა მატერიალური სარგებლის მიღების მიზნით ტრეფიკინგის სქემა შეიმუშავეს, რომელშიც საკუთარი არასრულწლოვანი შვილები ჩართეს.
გამოძიების ვერსიით, ბრალდებულები ბავშვებს ფსიქოლოგიური ძალადობის გამოყენებით ბათუმში, ტურისტულ ლოკაციებსა და სხვა ადგილებში მოწყალების თხოვნასა და ყვავილებით ვაჭრობას აიძულებდნენ, ხოლო მიღებულ თანხას თავად ითვისებდნენ.
უწყების ცნობით, მოსამართლის განჩინების საფუძველზე ჩატარებული ფარული საგამოძიებო მოქმედებების შედეგად სამართალდამცველებმა აღნიშნული ფაქტების დამადასტურებელი არაერთი მტკიცებულება მოიპოვეს.
ამ ეტაპზე დაზარალებული არასრულწლოვნები სახელმწიფო ზრუნვის სერვისცენტრებში არიან გადაყვანილი. შსს-ის ინფორმაციით, მათ ჯანმრთელობას საფრთხე არ ემუქრება.
გამოძიება საქართველოს სისხლის სამართლის კოდექსის 143² მუხლის მე-2 და მე-3 ნაწილებით მიმდინარეობს, რაც 17 წლამდე ვადით თავისუფლების აღკვეთას ითვალისწინებს.
