შინაგან საქმეთა სამინისტროს ინფორმაციით, ბათუმში ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების, ასევე, ნარკოტიკული საშუალების უკანონო შეძენა-შენახვის ბრალდებით, წარსულში ნასამართლევი პირი დააკავეს.
უწყების ცნობით, პატრულ-ინსპექტორებმა პირი გადამოწმების მიზნით გააჩერეს. მისი პირადი ჩხრეკის შედეგად სამართალდამცველებმა უკანონო ცეცხლსასროლი პისტოლეტი და 7 საბრძოლო ვაზნა ამოიღეს.
ასევე, დაკავებულის პირადი და საცხოვრებელი ბინის ჩხრეკის შედეგად, პოლიციამ ნარკოტიკული საშუალება „ალფა-პვპ“ აღმოაჩინა. გამოძიება სისხლის სამართლის კოდექსის 236-ე და 260-ე მუხლებით მიმდინარეობს. აღნიშნული მუხლები 8 წლამდე ვადით თავისუფლების აღკვეთას ითვალისწინებს.
