ბათუმში მიკროავტობუსით მგზავრობის საფასური გარკვეულ სამარშრუტო ხაზებზე 10 თეთრით გაიზარდა და 80 თეთრი გახდა. ინფორმაცია „აჭარა თაიმსს“ შპს „სონაგოში“ დაუდასტურეს.
კომპანიის განმარტებით, ტარიფის ზრდა ამ ეტაპზე შეეხო №25, 44, 45 და 46 სამარშრუტო ხაზებს.
მათივე ინფორმაციით, გადაწყვეტილება საწვავის ფასების მატებას უკავშირდება. „სონაგოში“ აცხადებენ, რომ მგზავრობის საფასურის გაზრდა კომპანიის შიდა გადაწყვეტილებაა და აღნიშნულ საკითხზე კომუნიკაცია ბათუმის მერიასთან ან საკრებულოსთან არ ყოფილა.
აღსანიშნავია, რომ მიკროავტობუსების მძღოლების მხრიდან ტარიფის თვითნებურად გაზრდის შემთხვევა წლების წინაც დაფიქსირდა.
ცნობისთვის, ბათუმის საკრებულოს გადაწყვეტილებით, რამდენიმე თვის წინ, გაიზარდა მგზავრობის საფასური მუნიციპალურ ტრანსპორტშიც.
