„დინამო ბათუმმა“ ახალგაზრდა ქართველი მეკარე ნოდარ ყალიჩავა დაიმატა. კლუბის ინფორმაციით, ყალიჩავასთან ხელშეკრულება 2027 წლის ბოლომდე, 1+1 პრინციპით, გაფორმდა. „თოლიები“ სურვილის შემთხვევაში ხელშეკრულებას კიდევ ერთი წლით გაახანგრძლივებენ.
„საფეხბურთო კლუბი „დინამო ბათუმი“ მოხარულია გაცნობოთ, რომ ქართველი მეკარე ნოდარ ყალიჩავა კარიერას ჩვენს კლუბში განაგრძობს. მხარეებს შორის ხელშეკრულება 2027 წლის ბოლომდე გაფორმდა. ამასთან, კლუბი ინარჩუნებს უფლებას, ის დამატებით ერთი წლით გაახანგრძლივოს“, – წერია „დინამო ბათუმის“ განცხადებაში.
25 წლის მეკარე „თოლიებს“ „წყალტუბოს სამგურალიდან“ შეუერთდა. ყალიჩავა „სამგურალში“ 2022-2025 წლებში თამაშობდა და ამ პერიოდის განმავლობაში „წყალტუბოელთა“ კარი 75 მატჩში დაიცვა.
„ბედნიერი ვარ „დინამო ბათუმში“ გადმოსვლით. ეს არის გუნდი, რომელიც ყოველთვის უმაღლესი მიზნებისთვის იბრძვის და, შესაბამისად, ჩემთვის დიდი პასუხისმგებლობაა ამ კლუბის მაისურის ტარება. მზად ვარ, ჩემი შრომითა და თავდადებით გუნდს წარმატების მიღწევაში დავეხმარო. მოუთმენლად ველი ჩვენს არაჩვეულებრივ გულშემატკივართან შეხვედრას და მოედანზე გასვლას“, – აღნიშნა ნოდარ ყალიჩავამ „დინამო ბათუმის“ პრესსამსახურთან ინტერვიუში.
ნოდარ ყალიჩავა ასევე იყო 21-წლამდე ნაკრების წევრი და იასპარეზა 2023 წლის ევროპის ჩემპიონატზე. როგორც კლუბმა განმარტა, ფეხბურთელი უკვე თურქეთშია და კლუბთან ერთად სეზონის განახლებისთვის ემზადება.
ავტორი: დიმიტრი გორგილაძე
