“ნაციონალური მოძრაობა” აჭარის მთავრობას კვლავ კორუფციაში ადანაშაულებს. პარტიის წევრების შეფასებით, სხვადასხვა ინფრასტრუქტურული სამუშაოები ხარვეზებით სრულდება, რაც საბიუჯეტო თანხების მითვისების შედეგია. რევაზ ხარაზის თქმით, აჭარაში ერთ მილიარდ ლარზე მეტი მოპარულია, რაზეც პროკურატურა გამოძიებას არ იწყებს.
რეზო ხარაზმა დღეს გამართულ ბრიფინგზე იმ შეჩერებულ პროექტებზე გაამახვილა ყურადღება, რომლებიც თანხის გახარჯვის მიუხედავად დაუსრულებელია.
“ხალხზე თვალში ნაცრის შეყრაა ბიძინა ივანიშვილისა და მისი მთავრობის აწ უკვე პრემიერის – ირაკლი კობახიძის მხრიდან დღეს, კორუფციასთან ბრძოლაზე საუბარი. სწორედ ეს ორი ადამიანი იყო და რჩება კორუფციის სათავეში. ეს ყვლაფერი განსაკუთრებით კარგად ჩანს აჭარაში. სწორედ, მათი ძალისხმევითა და ხელშეწყობით, ქართული ოცნების 11 წლიანი მმართველობის დროს გაძარცვეს აჭარა.
არც ოლიგარქ, არაფორმალურ მმართველ ივანიშვილს და არც მისი პარტიის თავმჯდომარეს, ახლა უკვე ქვეყნის პრემიერს, არასოდეს გაუპროტესტებია და მოუთხოვია გამოძიება და დასჯა იმ მაღაჩინოსნების, რომელთა ხელითაც ძარცვავდნენ ბათუმს და აჭარას. არსადროს გვინახია ივანიშვილ-კობახიძის პოზიცია იმ პროექტებზე, რომლებზეც ფული დაიხარჯა და სამუშაოები არ შესრულდა. მაგ: ბათუმის ნაპირგამაგრება-55 მილიონი; სარფის ნაპირგამაგრება-60 მილიონი; ფრიდონ ხალვაშის ქუჩის რეაბილიტაცია-19 მილიონი; გმირთა ხეივნის რეაბილიტაცია-23 მილიონი; ბათუმის შემოვლითი გზა ავტობანი-329 მილიონი; ბათუმის ნაგავსაყრელი-5 მილიონი; ყინულის სახლი და საცურაო აუზი-29 მილიონი და ბათუმის განათების სისტემების რეაბილიტაცია – 28 მილიონი.
არასდროს გაუპროტესტებია და მოუკითხავს საჯაროდ ღიად ამბავი ბათუმში, თუ როგორ გამდიდრდა თანამდებობის პირები მშენებლობის ნებართვებით. 70 პროექტში, აჭარაში მილიარდ ლარზე მეტი მოიპარა ივანიშვილ-კობახიძის მფარველობით 11 წლის განმავლობაში აჭარაში მათმა ხელდასმულმა ჩინოვნიკებმა,” – განაცხადა რეზო ხარაზმა ბრიფინგზე.
