ოპოზიცია პროკურატურას მიმართავს და ქობულეთის მერის სისხლის სამართლის პასუხისგებაში მიცემას ითხოვს. საკრებულოს დეპუტატმა ბრიფინგზე განაცხადა, რომ აუდიტის კრიტიკული დასკვნის შემდეგ პასუხისმგებლობა ლევან ზოიძეს უნდა დაეკისროს.
ლაშა კომახიძის თქმით, მერია კორუფციულ გარიგებებში შედის, რაც მაკონტროლებლების შესწავლის შედეგად კიდევ ერთხელ დადასტურდა. ოპოზიციონერ დეპუტატს მიაჩნია, რომ აუდიტის გააზრება უნდა მოხდეს და შესაბამისი ზომებიც დროულად გატარდეს.
“აუდიტმა დაადასტურა, რომ ივანიშვილის პარტიის მერი ლევან ზოიძე და მისი დაქვემდებარებული სამსახურები სისტემატიურად ჩადიან სისხლის სამართლის დანაშაულს. დადგინდა, რომ მუნიციპალიტეტში გრძელდება უნებართვო და უკანონო მშენებლობები, რაც მერის და მერიის კორუფციულ გარიგებებზე მიუთითებს. აუდიტის დასკვნაში ვკითხულობთ, რომ გასულ წელს მერიის დაქვემდებარებულ შპს-ებსა და სამსახურებში ზედმეტად გაცემულია 270 000 ლარი, ვითომ და ხელფასების სახით. ასევე დადასტურდა 25 000 ლარის უკანონო მითვისების ფაქტი.
დადასტურდა, რომ მერიამ მიითვისა 52 ტონა საწვავი, რომლის მიზნობრივ ხარჯვას ვერ ადასტურებს. მაშასადამე, გამოვლენილია უამრავი ფაქტი, რომელიც ადასტურებს, რომ მერი და მერიის სამსახურები ჩართულნი არიან ხალხის ფულის უკანონო მითვისებაში.
მივმართავთ საქართველოს პროკურატურას, სასწრაფოდ დაიწყოს სისხლის სამართლის გამოძიება მერის და მისი დამნაშავე სამსახურების წინააღმდეგ და ბიუჯეტის ქურდები მიეცნენ პასუხისგებაში. ასევე მივმართავ პირადად ლევან ზოიძეს, აიღოს პოლიტიკური პასუხისმგებლობა და სასწრაფოდ დატოვოს თანამდებობა,” – განაცხადა ბრიფინგზე ლაშა კომახიძემ.
ქობულეთის მერია ოპოზიციისა და სახელმწიფო აუდიტის კრიტიკულ დასკვნას ამ დრომდე არ გამოხმაურებია.
ინფორმაციისთვის: რას წერს სახელმწიფო აუდიტის სამსახური ქობულეთის მერიის საქმიანობაზე ნახეთ ბმულზე.
