ბათუმში, შერიფ ხიმშიაშვილის ქუჩაზე რუსები წვრთნებს უბნის სტადიონზე გადიან, რის გამოც ადგილობრივებს მოედანზე შესვლის შესაძლებლობა შეზღუდული აქვთ. ფაქტის შესახებ AJARATIMES.GE-ის ტერიტორიაზე მცხოვრებლებმა აცნობეს და დახმარება ითხოვეს.
ხიმშიაშვილის ქუჩის 21 ნომერში მცხოვრებლების თქმით, კვირაში სამი დღით, რამდენიმე საათის განმავლობაში სტადიონით სარგებლობას ვერ ახერხებენ. სტადიონი თავისუფალი მხოლოდ წვიმიან ამინდშია.
“რუსებმა აითვისეს ჩვენი სტადიონი, ჩვენი ბავშვები კი ვერ თამაშობენ. გასაოცარი იცით რა არის? რუსებს აქვთ სპორტული წრე, რომელიც ფასიანია, 130 ლარს იხდის თითოეული ბავშვი, სათამაშო სივრცედ კი ჩვენს მოედანს იყენებენ. არაერთხელ ვთხოვეთ სტადიონის დატოვება, თუმცა უშედეგოდ. პოლიციისთვის, ასევე მერიისთვის არ მიგვიმართავს, რადგან მათი რეაგირების იმედი არ გვაქვს, ამიტომ გადავწყვიტეთ მედიას შევატყობინოთ,” – გვითხრა ერთ-ერთმა ადგილობრივმა.
