ბათუმში, ფრიდონ ხალვაშის ქუჩის რეაბილიტაციის პროცესი ამ დრომდე არ დასრულებულა. მონაკვეთები, კი სადაც გზა და ტროტუარები მოპირკეთდა უკვე ავარიულია. ოპოზიცია კორუფციაზე საუბრობს და უხარისხოდ შესრულებული სამუშაოების გამო კონკრეტული პირების პასუხისმგებლობის დაყენებას ითხოვს.
ფრიდონ ხალვაშის ქუჩის რეაბილიტაცია 2023 წლის თებერვალში უნდა დასრულებულიყო. აჭარის უმაღლესი საბჭოს დეპუტატის თქმით, აღნიშნული პროექტი არის კორუფციის ნათელი მაგალითი.
„რეაბილიტაციის ვადამ რამდენჯერმე გადაიწია, ეს არის ცენტრალური გზა, ერთ-ერთი ცენტრალური არტერია, რომელიც ბათუმში შემოდის და იცით მოსახლეობა რა დღეში იყო ამ გზის მშენებლობის დროს და ახლა ხედავთ, რომ ეს გზა არის დაუმთავრებელი, დაუსრულებელი. ეს არის კორუფციის ნათელი მაგალითი და იმის, თუ როგორი მიდგომა აქვს „ქართულ ოცნებას“ ბათუმის მიმართ,“ – აცხადებს ლევან ანთაძე.
რეზო ხარაზი ბიძინა ივანიშვილს მიმართავს და მოუწოდებს აღნიშნული კორუფციული სქემით დაინტერესდეს. “ნაციონალური მოძრაობა” ასევე, ტენდერში გამარჯვებულ კომპანია „ერ ტე დესთან“ ხელშეკრულების შეწყვეტას, თანხის დაბრუნებასა და გამოძიების დაწყებას მოითხოვს.
„ბათუმში ფრიდონ ხალვაშის ქუჩის რეაბილიტაციასთან დაკავშირებით საავტომობილო გზების დეპარტამენტმა ტენდერი 2022 წლის 14 აპრილს გამოაცხადა და გამარჯვებულ კომპანია შპს „ერ ტე დე“-სთან ხელშეკრულება 13 ივნისს გააფორმა.
სამუშაოები 2023 წლის თებერვლამდე უნდა დასრულებულიყო, მაგრამ რამდენიმე ცვლილება ვადების გაგრძელებასა და პროექტში ცვლილებების შეტანასთან დაკავშირებით განხორციელდა, საბოლოოდ 2024 წლის 24 თებერვალს უნდა დასრულდეს. გამოვიდეს თორნიკე რიჟვაძე და გაგვცეს პასუხი, რასთან გვაქვს საქმე. დარწმუნებული ვარ, წლის ბოლომდეც ეს ქუჩა ვერ გაკეთდება“, – განაცხადა რეზო ხარაზმა.
