„შენი იდეა ბათუმს“ – თვითმმართველობამ 2023 წელს გამარჯვებული პროექტების განხორციელება ამ დრომდე ვერ შეძლო. „ჩვენი ბათუმელი ცუგუნები“, და „ადაპტირებული ბათუმი“ – პროექტების ავტორებისთვის დღემდე უცნობია მოწონებული იდეების დასრულებას რა აფერხებს.
„იმედგაცრუებული ვარ. ყოველგვარი ვადა ამოიწურა. მიუსაფრებს ამ ზამთრის გატარებაც ქუჩაში მოუწევთ. პროექტით გათვალისწინებული ერთი კომპონენტის (ერთჯერადი ვაქცინაციის) გარდა არაფერი შესრულებულა,“ – ამბობს „აჭარა თაიმსთან“ საუბრისას გამარჯვებული პროექტის ავტორი თეონა ყურშუბაძე.
„აჭარა თაიმსმა“ – მერიიდან ბოლო სამი წლის სტატისტიკა გამოითხოვა, რომლის მიხედვითაც ირკვევა, რომ მაგალითად, დღემდე შეუსრულებელია 2021 წელს გამარჯვებული პროექტი „ორგანული ნარჩენების კომპოსტირება“, ამ შემთხვევაშიც თვითმმართველობა არ განმარტავს რატომ გამოაცხადდა იდეა გამარჯვებულად თუ მის განხორციელებას ვერ შეძლებდა.
ბათუმის მერიამ 2022 წელს გამარჯვებული ორი პროექტის „გოგებაშვილის ქუჩაზე ტროტუარში ჩაფლული კნეხტის მინით დაფარვა“, და „საფეხმავლო ბილიკი“-ს განხორციელებაც ვერ შეძლო. მოწოდებულ საჯარო ინფორმაციაში წერია, სხვა იდეების მსგავსად აღნიშნული პროექტებიც „მიმდინარეა“.
მოწოდებულ საჯარო ინფორმაციაში არაა განმარტებული თუ რის გამო ვერ მოხდა გამარჯვებული პროექტების დაფინანსება და განხორციელება.
ინფორმაციისთვის: პროექტს ბათუმის მერია 2019 წლიდან ახორციელებს ამერიკის შეერთებული შტატების საერთაშორისო განვითარების სააგენტოს (USAID) დემოკრატიული მმართველობის ინიციატივის პროგრამა (GGI)-ის მხარდაჭერით.
“შენი იდეა ბათუმს” – პროექტის განხორციელება წინა მერის, ლაშა კომახიძის მმართველობის პერიოდში დაიწყო. ყველაზე მეტი პროექტის დაფინანსება და განხორციელება 2021 წელს მოხდა.
