საქართველოს შინაგან საქმეთა სამინისტროს მიგრაციის დეპარტამენტის თანამშრომლებმა, სამინისტროს შესაბამის დანაყოფებთან მჭიდრო კოორდინაციით, გასული თვის განმავლობაში უცხო ქვეყნის 121 მოქალაქე საქართველოდან გააძევეს.
შინაგან საქმეთა სამინისტროს ინფორმაციით, კომპლექსური ღონისძიებების შედეგად ქვეყნიდან გაძევებულ იქნა ინდოეთის, ირანის, თურქეთის, პაკისტანის, ერაყის, ეგვიპტის, ლიბანის, მაროკოს, ფილიპინების, იორდანიის, ბანგლადეშის, ჩადის, კოტ-დიუარის, რუმინეთის, რუსეთის, ნიგერიისა და სხვა ქვეყნების მოქალაქეები.
მოქმედი კანონმდებლობის შესაბამისად, აღნიშნულ პირებს საქართველოს ტერიტორიაზე შემოსვლა აეკრძალათ განსაზღვრული ვადით. შსს-ს მიგრაციის დეპარტამენტის ინფორმაციით, უწყება აგრძელებს უკანონო მიგრაციის წინააღმდეგ ბრძოლას და საქართველოში სამართლებრივი საფუძვლის გარეშე მყოფი უცხო ქვეყნის მოქალაქეების გამოვლენასა და კანონით დადგენილი წესით გაძევებას.
