ხელვაჩაურის მუნიციპალიტეტში, სოფელ კაპრეშუმში, სოციალურ საცხოვრებელ კორპუსებში მცხოვრებლები შენობების უსაფრთხოებაზე სერიოზულ შეშფოთებას გამოთქვამენ. მათი თქმით, კედლებზე გაჩენილი ბზარები ყოველდღიურად ფართოვდება, ნაპრალები კი როგორც სადარბაზოებში, ისე საცხოვრებელ ბინებშია დაფიქსირებული.
ადგილობრივები ასევე აცხადებენ, რომ შენობების ფასადიდან ბათქაში ცვივა, რაც განსაკუთრებით ბავშვებისთვის საფრთხის შემცველია. პრობლემებს ემატება გაუმართავი საკანალიზაციო სისტემა მილები ხშირად იჭედება, რის შედეგადაც ფეკალური მასა ეზოში იღვრება და მძაფრი სუნი დგება.
კორპუსების ეზოებში არ ფუნქციონირებს გარეგანათების სისტემა, დაზიანებულია სკამებიც, რაც დასახლებაში საცხოვრებელ გარემოს კიდევ უფრო ართულებს.
ეკომიგრანტების თქმით, მათ არაერთხელ მიმართეს „ქართული ოცნების“ ხელვაჩაურის მერიას შენობების მდგრადობის შესწავლისა და არსებული პრობლემების მოგვარების მოთხოვნით, თუმცა შესაბამისი რეაგირება ამ დრომდე არ მომხდარა. სწორედ ამიტომ, ადგილობრივებმა გადაწყვიტეს, პრობლემებზე მედიასთან ღიად ესაუბრათ.
