უსკომ აჭარის უმაღლესი საბჭოს არჩევნების შედეგები ხმაურისა და კამათის ფონზე შეაჯამა. სხდომის პარალელურად შენობასთან სხვადასხვა პოლიტიკური პარტიებისა და რიგით მოქალაქეების აქცია მიმდინარეობდა.
მოქალაქეებსა და პოლიტიკური პარტიების წარმომადგენლებს მიაჩნიათ, რომ საქართველოს პარლამენტის არჩევნებთან ერთად უმაღლესი საბჭოს არჩევნებიც გაყალბდა და მონაცემები ხალხის ნებას არ ასახავს. შეკრებილებმა ხმის ფარულობის დარღვევის შესახებაც ისაუბრეს და ხელახალი არჩევნების ჩატარება მოითხოვეს.
სხდომაზე უსკოს ოთხი წევრი დღის წესრიგში ცვლილების შეტანას ითხოვდა. კერძოდ, ისინი ვერიფიკაციის აპარატის გახსნასა და ინფორმაციის გადამოწმებას, ასევე, დაწერილი საჩივრების ხელახლა განხილვას ითხოვნდნენ.
“არსებობს კითხვები და ჩვენ მარტივად შეგვიძლია გადავამოწმოთ. ამოვიღოთ ვერიფიკაციის აპარატიდან ის მონაცემები, რაც მოგვცემს შესაძლებლობას გავარკვიოთ იყო თუ არა კონკრეტული ამომრჩეველი კონკრეტულ უბანზე მისული,” – თქვა სხდომის მიმდინარეობისას ზურა გოლიაძემ.
“ამომრჩევლის ხმის მიცემის ფარულობა არ იყო დაცული, აქედან გამომდინარე ვიხელმძღვანელოთ არჩევნების შესახებ აჭარის ავტონომიური კანონის 67-ე მუხლის შესაბამისად შედეგები და გაბათილებულად გამოვაცხადოთ შედეგები. დავნიშნოდ ხელახალი არჩევნები,” – თქვა სხდომაზე სულხან ტაკიძემ.
“ვეთანხმები კოლეგების მოსაზრებებს. მე ვერ დავუჭერ მხარს მოპარული არჩევნების აღიარებას. ხმის მიცემის ფარულობა ყველგან დარღვეული იყო,” – განაცხადა ივანე ფირცხალაიშვილმა.
“არჩევანის ფარულობა არ იყო დაცული, უამრავი საჩივარი დაიწერა, რასაც არ მოჰყვა რეაგირება. ზოგიერთ ბიულეტენზე 41 ნომრის გასწვრივ კალმით იყო წერტილები დასმული. უამრავი დარღვევა იყო, რაც მე მიწერია დოკუმენტში და დავურთავ სხდომის ოქმს,” – თქვა კახა ჯაიანმა, რომელსაც უსკოს თავმჯდომარესთან მთელი სხდომის განმავლობაში სიტყვიერი დაპირისპირება ჰქონდა.
უსკოს წევრების ეს მოთხოვნები თავმჯდომარემ არ გაიზიარა, შესაბამისად დღის წესრიგი უცვლელად დარჩა. შედეგების შეჯამების შემდეგ კი პარმენ ჯალაღონიამ დოკუმენტს ხელი მოაწერა.
“უსკო საკუთარ სხდომებზე აჯამებს არჩევნების შედეგებს თუ კი დამთავრებულია სასამართლო და საოლქო სხდომები კონკრეტულ დავებზე. უმაღლეს საარჩევნო კომისიას კანონდებლობით სხვა გადაწყვეტილების მიღება არ შეუძლია,” – განაცხადა სხდომის დასრულებისას პარმენ ჯალაღონიამ.
უსკოს თავმჯდომარეს ჟურნალისტებმა არჩევნების შედეგებისა და გაყალბების შესახებ მოსაზრების დაფიქსირება სთხოვეს, მათ შორის რას ფიქრობდა ის ყოფილი სამსახურის (საიას) საჩივრებზე – კითხვები პარმენ ჯალაღონიამ უპასუხოდ დატოვა.
[embedyt] https://www.youtube.com/watch?v=0nT5epvsifI[/embedyt]
ინფორმაციისთვის: უსკოს მონაცემების თანახმად, 5%-იანი ბარიერი გადალახა 5-მა საარჩევნო სუბიექტმა:
- “კოალიცია ცვლილებებისათვის – გვარამია, მელია, გირჩი, დროა” – 1 მანდატი;
- “ერთიანობა-ნაციონალური მოძრაობა”- 4 მანდატი;
- “ძლიერი საქართველო – ლელო ხალხისთვის, თავისუფლებისთვის”- 1 მანდატი;
- “გახარია საქართველოსთვის”- 2 მანდატი;
- “ქართული ოცნება”-13 მანდატი.
