ცოლის მკვლელობაში ბრალდებულს წინასწარი პატიმრობა შეეფარდა, ამის შესახებ გადაწყვეტილება მოსამართლე თამარ ბეჟანიშვილმა ცოტა ხნის წინ მიიღო.
პროკურორის ინფორმაციით, ბრალდებულის ჯანმრთელობის მდგომარეობა გაუმჯობესდა და ის კონტაქტურია. ბრალის წარდგენის სხდომაზე დაცვის მხარემ აღმკვეთი ღონისძიების სახით, 10 ათასი ლარის შუამდგომლობა დააყენა, რასაც მოსამართლე არ დაეთანხმა.
მოსამართლე თამარ ბეჟანიშვილი ასევე, ბრალდებულის ადვოკატის მოთხოვნას, სხდომის დახურვის შესახებ არ დაეთანხმა.
„მტკიცებულებები საკმარისია, რომ ბრალდებულმა დანაშაული ჩაიდინა. არსებობს მიმალვისა და მტკიცებულებების განადგურების საფრთხე. ბრალდება 16-20 წლამდე ან უვადო პატიმრობას ითვალისწინებს. მსგავსი დანაშაულის ჩადენის საფრთხე გენდერის ნიშნით არსებობს, ქმედების ჩადენის ხერხი ცალსახად მიუთითებს, რომ თავისუფლებაში ყოფნისას მაღალია რისკი, რომ სხვა პირთა ჯანმრთელობას და სიცოცხლეს საფრთხე შეუქმნას. გამოიკითხა მოწმეები, რომელთა უმრავლესობა ბრალდებულის ნათესავია. ბრალდებულის ჯანმრთელობის მდგომარეობა მკვეთრად არის გაუმჯობესებული, შესაძლოა, ნებისმიერ დროს გაეწეროს საავადმყოფოდან. შესაბამისად, მისი თავისუფლებაში ყოფნა დაუშვებელია”, – აღნიშნა პროკურორმა თორნიკე გოგეშვილმა.
თავის მხრივ, ადვოკატები აღნიშნავდნენ, რომ ბრალდებულის მიმალვის საფრთხე არ არსებობს.
„პროკურორი ამბობდა, რომ მიმალვის საფრთხეა, რაც არ არსებობს, რადგან ბრალდებულმა თვითმკვლელობა სცადა. იგი წარსულში ნასამართლევი არ არის. გთხოვთ, რომ არ შეუფარდოთ პატიმრობა. სასამართლოს ვთხოვთ გირაოს 10 ათასი ლარის ოდენობით”, – აღნიშნა ბრალდებულის ადვოკატმა.
საქმეზე წინასასამართლო სხდომა 4 ივნისს 12:00 საათზე გაიმართება.
ინფორმაციისთვის: დღეს, სასტიკად მოკლული ქალის ახლობლებმა აქცია გამართეს და ბრალდებულის მკაცრად დასჯა მოითხოვეს. მათი თქმით, სასამართლოს ენდობიან, თუმცა ამის მიუხედავად ითხოვენ, რომ განზრახ მკვლელობაში ბრალდებულს სამუდამო პატიმრობა უნდა მიესაჯოს.
ცნობისთვის: მკვლელობაში ბრალდებულის აღმკვეთი ღონისძიების საკითხზე სასამართლო დღეს იმსჯელებს. თავად ბრალდებული სამედიცინო დაწესებულებაშია მოთავსებული, მან ცოლის მოკვლის შემდეგ თვითდაზიანება მიიყენა.
