ძველ ბათუმში არის ერთი ადგილი, სადაც დილა ყავის სურნელით და ბათუმური ამბების განხილვით იწყება.
ზვიად გამსახურდიას ქუჩაზე, ერთ-ერთი იტალიური ეზოს შესასვლელთან, უკვე ათ წელზე მეტია, რაც ლია ჯახია შვილთან ერთად, ყავას ქვიშაზე ამზადებს.
სივრცეს „ყავის გვირაბი“ შეარქვეს. აქ დილა სამეზობლო ყავითა და ბათუმური ამბების განხილვით იწყება, შემდეგ კი მთელი დღის განმავლობაში სხვადასხვა ქვეყნის ტურისტებსა და ადგილობრივებს მასპინძლობენ.
„ყავის გვირაბში“ თანამედროვე აპარატული ყავის დაგემოვნებაც შესაძლებელია, თუმცა ყველაზე დიდი მოთხოვნა მაინც ქვიშაზე მოხარშულ, არომატულ ნალექიან ყავაზეა.
ლია ჯახიამ და მისმა შვილმა ეს საქმე წლების წინ, ბათუმის მერიის ერთ-ერთი პროგრამის ფარგლებში დაიწყეს. პატარა იდეა კი, რომელიც თავდაპირველად უბრალოდ საქმის დაწყების შესაძლებლობა იყო, მოგვიანებით მათი ოჯახის შემოსავლის წყაროდ იქცა.
აქ ყავას მხოლოდ არ ამზადებენ, ადამიანებს მასპინძლობენ, ესაუბრებიან და ძველი ბათუმის ერთ პატარა, მაგრამ გამორჩეულ ისტორიას ყოველდღე აგრძელებენ.
