დღეს, 30 იანვარს, ბათუმის ხელოვნების უნივერსიტეტის აკადემიურმა საბჭომ რექტორის მოვალეობის შემსრულებლად მამუკა ალაფიშვილი აირჩია. გადაწყვეტილება ერთხმად მიიღეს და განსხვავებული მოსაზრება არ დაფიქსირებულა.
მამუკა ალაფიშვილი რექტორობის კანდიდატურა პრაქტიკულად უალტერნატივო იყო, რადგან სოფიო თავაძემ, საარჩევნო პროცესამდე ერთი დღით ადრე კანდიდატურა მოხსნა. ამ უკანასკნელმა გადაწყვეტილების მოტივი საზოგადოებას არ აუხსნა.
მამუკა ალაფიშვილის პოლიტიკური გემოვნება ცნობილია. ის დაკავშირებულია „ქართულ ოცნებასთან“. ამბობს, რომ მხარს უჭერს მმართველი პარტიის პოლიტიკურ კურს, მათ შორის საგარეო პოლიტიკაში. ალაფიშვილი ასევე, რუსული კანონის მხარდამჭერიცაა.
„არცერთ პარტიაში ვარ, შეგიძლია გადაამოწმოთ. ჩემი მიზანია, რომ უნივერსიტეტში არცერთი მხარე იყოს დაპირისპირებაში. ვემხრობი „ქართული ოცნების“ პოლიტიკას, მათ შორის საგარეო კურსთან მიმართებაშიც. არ მიმაჩნია, რომ საპარლამენტო არჩევნები უნდა ჩატარდეს, რადგან ოქტომბრის არჩევნები ლეგიტიმურია. მე არ ვთვლი, რომ „გამჭვირვალობის კანონი“ რუსულია, პოლემიკაში არ შემოვდივარ, პოლიტიკოსი არ ვარ… ისეთი პასუხები გაგეცით, რაც არ მოგეწონათ როგორც ჩანს“, – განაცხადა მამუკა ალაფიშვილმა.
ინფორმაციისთვის: ბათუმის ხელოვნების უნივერსიტეტი რექტორის მოვალეობის შემსრულებელი ექვსი თვის ვადით აირჩიეს. რექტორის თანამდებობა მას შემდეგ გახდა ვაკანტური, რაც თემურ კეჟერაძემ თანამდებობა საკუთარი განცხადების საფუძველზე დატოვა.
ცნობისთვის: არჩევნების პარალელურად, ხელოვნების უნივერსიტეტში პროტესტი გრძელდება. ორ კვირაზე მეტია სტუდენტები ღამეს უნივერსიტეტში ათენებენ. ისინი რიგგარეშე არჩევნებსა და საპროტესტო აქციებზე დაპატიმრებულების გათავისუფლებას ითხოვენ.
https://www.facebook.com/ajaratimes/videos/1317618109556177/
