თითქმის სამი თვეა გასული მას შემდეგ, რაც ბათუმში, სასტუმრო „შერატონის“ ფოიეში, ცნობილ ჟურნალისტსა და სამოქალაქო აქტივისტზე, ზვიად ქორიძეზე ჯგუფური ძალადობა განხორციელდა.
ქორიძე იმ დროს ბათუმში სამსახურებრივ მივლინებაში იმყოფებოდა და პოლიტიკური პატიმრის, მზია ამაღლობელის სასამართლო პროცესს ესწრებოდა.
როგორც „საერთაშორისო გამჭვირვალობა – საქართველო“ აცხადებს, თავდასხმაში უშუალოდ მონაწილეობდნენ „ქართული ოცნების“ მაღალჩინოსნები: პარტიის რეგიონული მდივანი და ე.წ. პარლამენტის წევრი დიმიტრი სამხარაძე, აჭარის უმაღლესი საბჭოს ფრაქციის ყოფილი თავმჯდომარე გიორგი მანველიძე, საქართველოს მთავრობის ადმინისტრაციის დეპარტამენტის უფროსი ნიკა ტყემალაძე, მისი მძღოლი გოჩა სამხარაძე და კიდევ ორი პირი.
ზვიად ქორიძე უკვე დაზარალებულად არის ცნობილი სისხლის სამართლის საქმეზე, რომელსაც აჭარის პროკურატურა იძიებს, თუმცა, მიუხედავად დამაჯერებელი მტკიცებულებებისა — ექსპერტიზის დასკვნები, თვითმხილველთა ჩვენებები და ვიდეოკადრები — ამ დრომდე არავის მიმართ დაყენებულა ბრალდება.
„საერთაშორისო გამჭვირვალობის“ თქმით, სასტუმრო „შერატონის“ ადმინისტრაციამ, მიუხედავად არაერთი მოთხოვნისა, არ გადასცა სათვალთვალო კამერების ჩანაწერები არც ქორიძეს და არც ორგანიზაციას. საქმეში არსებული ვიდეოკადრები სხვა სუბიექტების, მათ შორის „ლიბერთი ბანკის“ კამერებიდან არის და არ ასახავს სასტუმროს ფოიეში განვითარებულ ძალადობას.
ორგანიზაციის ინფორმაციით, თავად ძალადობის მონაწილე პირებიც არ უარყოფენ ინციდენტში მონაწილეობას, თუმცა ცდილობენ ინციდენტის ინიციატორად ქორიძე წარმოაჩინონ. სასტუმროს პერსონალის ჩვენებებში ქორიძის მხრიდან პროვოკაციული ქმედების ნიშნები არ იკვეთება.
„ქართული ოცნების“ მხრიდან მომხდარი ძალადობის გამოუძიებლობა, ორგანიზაციის განცხადებით, არა მხოლოდ ზვიად ქორიძეზე თავდასხმაა, არამედ შეტევაა სამოქალაქო საზოგადოებასა და მედიაზე. მათი თქმით, პროკურატურის ასეთი მიდგომა მხოლოდ ახალ ძალადობრივ აქტებს შეუწყობს ხელს.
„საერთაშორისო გამჭვირვალობა – საქართველო“ კიდევ ერთხელ მოუწოდებს პროკურატურას, დროულად მიიღოს ზომები და საქმე ბოლომდე მიიყვანოს — მოტივირებული და გავლენიანი დამნაშავეები პასუხისგებაში უნდა მიეცნენ.
გიორგი გახარიასა და ზვიად ქორიძეზე თავდასხმის ფაქტზე გამოძიება დაიწყო
