ვაჟა თავართქილაძე იმ ინსპექტორის პასუხსგებაში მიცემას ითხოვს, რომელმაც მისი თქმით, თანამშრომელ ქალზე ფიზიკურად იძალადა. მეწარმემ დღეს ბრიფინგი გამართა და საჯარო მოხელის დასჯის მოთხოვნით სპეციალურ საგამოძიებო სამსახურს კიდევ ერთხელ მიმართა.
ვაჟა თავართქილაძე არჩილ ჩიქოვანს ღიად უპირისპირდება. „ბათუმის ზონდერი მერი ხალხის მტერი“ – წარწერა მეწარმემ საკუთარ ობიექტზე გასულ წელს მიამაგრა.
საქმე ისაა, რომ მეწარმის პროტესტის ეს ფორმა ბათუმის მერიისთვის მიუღებელი აღმოჩნდა. კერძოდ, ვაჟა თავართქილაძის თქმით, არჩილ ჩიქოვანთან ღია დაპირისპირების გამო, სანებართვო დოკუმენტაციის გახანგრძლივებაზე უარი უთხრეს. მეწარმეს საშაურმის წინ, ტროტუარზე მაგიდების განთავსება სურდა.
ინფორმაციისთვის: ბათუმის საქალაქო სასამართლოს მოსამართლემ მეწარმე 1000 ₾არით დააჯარიმა, რაც მოგვიანებით სააპელაციო სასამართლომ უკანონოდ ცნო, შესაბამისად ვაჟა თავართქილაძის პროტესტის ეს ფორმა ზემდგომმა ინსტანციამ კონსტიტუციით გარანტირებული გამოხატვის თავისუფლებით სარგებლობის ფორმად ჩათვალა.
„ნებართვის ვადის ამოწურვამდე მოვარდა ბათუმის მერიის 15 თანამშრომელი და მოგვაყენეს მატერიალური ასევე, ფინანსური ზარალი. თანამშრომელ ქალს, ლამზირა ხუნდაძეს, რომელიც ინციდენტისას ვიდეოს გადაღებას ცდილობდა ფიზიკურად გაუსწორდნენ,“ – ამბობს ვაჟა თავართქილაძე.
