საქართველოს პროკურატურამ ერთ პირს ბრალდება წარუდგინა არასრულწლოვანის მიმართ სექსუალური ხასიათის ქმედების, გარყვნილი ქმედებისა და მუქარის ფაქტებზე.
უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა სხვადასხვა დროს, ძალადობის გამოყენებით, არასრულწლოვანი მეზობლის მიმართ სექსუალური და გარყვნილი ქმედებები განახორციელა. გარდა ამისა, ის არასრულწლოვანს ოჯახის წევრების მოკვლით დაემუქრა იმ შემთხვევაში, თუ დაზარალებული მომხდარს გაავრცელებდა.
სამართალდამცველებმა ბრალდებული 2025 წლის 28 ოქტომბერს, სასამართლოს განჩინების საფუძველზე დააკავეს. მას ბრალად ედება საქართველოს სისხლის სამართლის კოდექსის:
- 138-ე მუხლის მე-3 ნაწილის „ა“ ქვეპუნქტით – სექსუალური ხასიათის სხვაგვარი ქმედება, ჩადენილი ძალადობით ან ძალადობის მუქარით არასრულწლოვანის მიმართ;
- 141-ე მუხლის პირველი ნაწილით – გარყვნილი ქმედება თექვსმეტი წლის ასაკს მიუღწეველი პირის მიმართ;
- 151-ე მუხლის მე-2 ნაწილის „გ“ ქვეპუნქტით – მუქარა, ჩადენილი წინასწარი შეცნობით არასრულწლოვანის მიმართ.
დანაშაულები 15 წლამდე თავისუფლების აღკვეთას ითვალისწინებს. პროკურატურამ უკვე მიმართა სასამართლოს ბრალდებულის მიმართ აღკვეთის ღონისძიებად პატიმრობის გამოყენების მოთხოვნით.
