„ქართული ოცნების“ პარლამენტის თავმჯდომარის, შალვა პაპუაშვილის განცხადებით, მომავალ საპარლამენტო არჩევნებზე საქართველოს მოქალაქეებს ხმის მიცემა მხოლოდ ქვეყნის ტერიტორიაზე შეეძლებათ. გადაწყვეტილება მსგავსია ადგილობრივი თვითმმართველობის არჩევნებზე მოქმედი რეგულაციისა.
პაპუაშვილის განმარტებით, მოქალაქეების საარჩევნო უფლებები სრულად ინარჩუნებს ძალაში, თუმცა პროცედურა იცვლება:
„არაფერი იცვლება სხვა სახელმწიფოში მყოფი საქართველოს მოქალაქეების საარჩევნო უფლებაში. ცვლილება ეხება მხოლოდ ხმის მიცემის პროცესს – როგორც ადგილობრივი თვითმმართველობის არჩევნებზე, ასე საპარლამენტო არჩევნებზეც, მოქალაქე ხმა საქართველოს სახელმწიფო საზღვრებში უნდა მისცეს.“
მისივე თქმით, გადაწყვეტილება ეფუძნება საქართველოს კონსტიტუციის 24-ე მუხლს, რომელიც სახელმწიფოს ვალდებულებას აწესებს, უზრუნველყოს ნების თავისუფალი გამოვლენა, რათა ხმა იყოს გარე ჩარევისგან თავისუფალი. პაპუაშვილის შეფასებით, საზღვარგარეთ მყოფი მოქალაქეების შემთხვევაში მაღალია საინფორმაციო მანიპულაციის და გარე ზემოქმედების რისკები.
„2024 წლის საპარლამენტო არჩევნებმა აჩვენა, რამდენად მოწყვლადი შეიძლება იყოს უცხოელი გავლენების მიმართ ამომრჩეველი. არარეზიდენტი მოქალაქეების შემთხვევაში უფრო მაღალია ინფორმაციის მანიპულირების შესაძლებლობა. ამის თავიდან აცილების მიზნით, ხმის მიცემა მხოლოდ საქართველოს ტერიტორიაზე უზრუნველყოფს არჩევნების მედეგობას, ამცირებს გარე ზემოქმედებას და აძლევს მოქალაქეს უფრო ინფორმირებულ არჩევანს,“ – განაცხადა პაპუაშვილმა.
პაპუაშვილის თქმით, ეს პრაქტიკა უკვე მოქმედებს ისეთ ქვეყნებში, როგორებიცაა ირლანდია, მალტა, ისრაელი და სომხეთი. მთავარი რისკის შემცირებისა და არჩევანის ინფორმირებულობის მიზნით, მოქალაქეებს ყოველ ოთხ წელიწადში ერთხელ სამშობლოში ჩამოსვლა და არჩევნებში მონაწილეობა მოუწევთ.
