სურსათის ეროვნულმა სააგენტომ აჭარაში, ხელვაჩაურის მუნიციპალიტეტში, ფრინველის არალეგალური სასაკლაო გამოავლინა და ობიექტს საწარმოო პროცესი შეუჩერა.
სააგენტოს ინფორმაციით, შპს „ატო“ (მისამართი: ხელვაჩაურის მუნიციპალიტეტი, ფანასკერტელ-ციციშვილის ქ. N29) ფერმის ტერიტორიაზე ფრინველის დაკვლას ვეტერინარული ზედამხედველობის გარეშე ახორციელებდა.
ინსპექტირების შედეგად დადგინდა სანიტარიულ-ჰიგიენური ნორმებისა და ტექნოლოგიური პროცესის უხეში დარღვევები. ბიზნესოპერატორს არ ჰქონდა სურსათის ეროვნული სააგენტოს სავალდებულო აღიარება და საქმიანობდა ეკონომიკურ საქმიანობათა რეესტრში რეგისტრაციის გარეშე.
სურსათის ეროვნული სააგენტოს განცხადებით, ბიზნესოპერატორი დაჯარიმდა მოქმედი კანონმდებლობის შესაბამისად.
