„დინამო ბათუმში“ განახლების პროცესი გრძელდება. კლუბის ოპერირებაზე ახალი მენეჯმენტი იქნება პასუხისმგებელი. ინფორმაციას „დინამო ბათუმი“ ავრცელებს.
„თურქულ შეკრებაზე ბათუმის „დინამოს“ ახალი მფლობელისა და აქციონერების გაცნობის შემდეგ, კლუბში განახლების პროცესი გრძელდება. „დინამოში“ მართვის ახალი მოდელი ყალიბდება, რომლის ერთ-ერთი მთავარი მიზანი, მართვის სადავეებისა და პასუხისმგებლობის გამიჯვნასთან ერთად, კლუბის გრძელვადიანი, მდგრადი განვითარებისა და ახალი სტრატეგიის შემუშავება იქნება“, – წერია განცხადებაში.
„თოლიების“ გენერალური მენეჯერის თანამდებობას გამოცდილი ქართველი სპეციალისტი ნიკოლოზ ჯღარკავა დაიკავებს. იგი პასუხისმგებელი იქნება კლუბის მართვაზე, ლიცენზირების სტანდარტების დაცვაზე, სპორტული და ბიზნეს მიმართულებების კოორდინაციაზე.
ჯღარკავა „ბათუმში“ გადმოსვლამდე იკავებდა საქართველოს ფეხბურთის ფედერაციის ვიცე-პრეზიდენტის თანამდებობას. ასევე მუშაობდა „დინამო თბილისისა“ და „დინამო არენის“ გენერალურ დირექტორად. ახალ მფლობელთან ერთად კლუბში განახლებული მართვის მოდელი ჩამოყალიბდა. ის დაყოფილია სამ მთავარ მიმართულებად:
საფეხბურთო ოპერაციები – ამ მიმართულებაზე პასუხისმგებლობა ნიკა ჭანტურიას ეკისრება, რომელიც საფეხბურთო ოპერაციების მენეჯერის თანამდებობას დაიკავებს. მის მოვალეობაში შედის პირველი გუნდისა და აკადემიის ყოველდღიური საოპერაციო მართვა, გუნდის ლოჯისტიკის უზრუნველყოფა, ასევე საწვრთნელო პროცესისა და მატჩის დღეების ორგანიზება. ნიკა ჭანტურია „დინამო ბათუმში“ დასაქმებამდე „თბილისის ლოკომოტივის“ სპორტული დირექტორი იყო, ხოლო საფეხბურთო კარიერის განმავლობაში სხვადასხვა ქართულ გუნდში თამაშობდა.
საფეხბურთო სტრატეგია – ამ მიმართულების ხელმძღვანელი ზურაბ თიგიშვილია. მის მოვალეობაში შედის „დინამო ბათუმის“ სატრანსფერო პოლიტიკის მართვა, სკაუტინგისა და რეკრუტინგის პროცესების კურირება. ზურაბ თიგიშვილი უცხოური გამოცდილების მქონე სპეციალისტია. „თოლიებთან“ თანამშრომლობამდე იგი მუშაობდა საერთაშორისო საფეხბურთო სააგენტო GG11 Sports Agency-ში საფეხბურთო აგენტის პოზიციაზე.
ფეხბურთის განვითარება – ფეხბურთის განვითარების მენეჯერი ზურაბ ორაგველიძე იქნება. იგი პასუხისმგებელი იქნება „დინამო ბათუმის“ აკადემიაში სასწავლო მეთოდოლოგიის ჩამოყალიბებაზე, მწვრთნელთა განათლებასა და ფეხბურთელთა განვითარების უზრუნველყოფაზე. „დინამო ბათუმი“ ახალ მენეჯმენტთან ერთად მოსამზადებელ სამუშაოებს განაგრძობს. კლუბი პირველ ოფიციალურ შეხვედრას 1 მარტს გამართავს – ეროვნული ლიგის პირველ ტურში „ბათუმი“ სტუმრად „დინამო თბილისს“ დაუპირისპირდება.
ავტორი: დიმიტრი გორგილაძე
