ფოტო: აჭარა თაიმსი / ბაჩანა საჯაია
ევროპის საბჭოს წამებისა და არაადამიანური მოპყრობის პრევენციის კომიტეტმა CPT გამოაქვეყნა ანგარიში, რომელიც ეფუძნება კომიტეტის 2024 წლის ნოემბერსა და 2025 წლის იანვარში საქართველოში განხორციელებულ ვიზიტებს.
ანგარიშის ერთ-ერთი ნაწილი ეხება საპროტესტო აქციებზე დაკავებული მოქალაქეების მიმართ პოლიციის მხრიდან მოპყრობას. დოკუმენტში აღწერილია შემთხვევები, როდესაც დემონსტრანტების დაკავება ხდებოდა რამდენიმე პოლიციელისგან შემდგარი ჯგუფების მიერ, მათ შორის ათზე მეტი თანამშრომლის მონაწილეობით. ანგარიშის მიხედვით, დაკავებულები აცხადებდნენ, რომ მათზე ძალადობა ხორციელდებოდა მაშინაც, როცა ისინი წინააღმდეგობას არ უწევდნენ და სრულად იყვნენ პოლიციის კონტროლის ქვეშ.
CPT-ის ანგარიშში ასევე აღნიშნულია, რომ ძალის გამოყენება, დაკავებულთა ჩვენებების მიხედვით, ხდებოდა განმეორებით და ერთდროულად რამდენიმე თანამშრომლის მიერ, მათ შორის იმ პირობებშიც, როდესაც დაკავებულებს ხელები ზურგს უკან ჰქონდათ შეკრული ან მიწაზე იმყოფებოდნენ. დოკუმენტი მიუთითებს სიტყვიერ შეურაცხყოფასა და მუქარაზეც.
კომიტეტი „qarTuli ocnebis“ ხელისუფლებას მოუწოდებს, გადადგას კონკრეტული ნაბიჯები იმის უზრუნველსაყოფად, რომ ადამიანების დაკავებისას სამართალდამცავებმა გამოიყენონ მხოლოდ „აბსოლუტურად აუცილებელი და პროპორციული ძალა“ და ეფექტიანად აღკვეთონ არასათანადო მოპყრობის ყველა შემთხვევა.
