არასამთავრობო ორგანიზაცია „საერთაშორისო გამჭვირვალობა – საქართველო“ აქვეყნებს კვლევას, რომლის მიხედვითაც არაერთი კომპანია აგრძელებს რეკლამის განთავსებას ტელეკომპანიებზე „იმედი“ და „POSTV“, რომლებიც საერთაშორისო სანქციების ქვეშ იმყოფებიან.
აღნიშნული მედიასაშუალებები 2026 წლის 24 თებერვალს დიდი ბრიტანეთის მიერ დასანქცირდა რუსეთის სასარგებლოდ დეზინფორმაციის გავრცელების გამო.
კვლევის მიხედვით, 2026 წლის თებერვალში ჩატარებული მონიტორინგის შედეგად გამოვლინდა კომპანიები, რომლებიც აღნიშნულ არხებზე რეკლამას ათავსებდნენ. მათ შორის არიან: RMG, Hyundai Auto Georgia, Scapp, Colgate, GM Pharma (კორვალ G) და Natali Group.
TI-ის შეფასებით, სანქცირებულ მედიასაშუალებებთან თანამშრომლობა კომპანიებისთვის სერიოზულ რისკებს ქმნის. მათ შორისაა ე.წ. მეორადი სანქციების საფრთხე, რაც შეიძლება გამოიხატოს საერთაშორისო ფინანსურ სისტემაზე წვდომის შეზღუდვით, საბანკო ოპერაციების გართულებითა და რეპუტაციული ზიანით.
ორგანიზაცია განმარტავს, რომ დაწესებული სანქციები მნიშვნელოვნად ართულებს ტელეკომპანიების ფუნქციონირებას, მათ შორის ფინანსური ტრანზაქციების განხორციელებას, თანამშრომლების ანაზღაურებასა და საერთაშორისო პარტნიორებთან თანამშრომლობას.
„საერთაშორისო გამჭვირვალობა საქართველო“ ბიზნესს მოუწოდებს, თავი შეიკავონ სანქცირებულ მედიასაშუალებებთან თანამშრომლობისგან, რათა თავიდან აიცილონ შესაძლო სამართლებრივი და ფინანსური რისკები.
