ბათუმში ტაქსის მძღოლების ნაწილი გაიფიცა. პროტესტის მონაწილეები ახალი ბულვარის ტერიტორიაზე შეიკრიბნენ და მუშაობა დროებით შეწყვიტეს, მათ ტაქსის აპლიკაციები Bolt, Maxim და Yandex გათიშეს.
მძღოლების განცხადებით, არსებული სამუშაო პირობები მნიშვნელოვნად გაუარესებულია. მათი თქმით, საწვავის ფასის ზრდამ შემოსავალზე პირდაპირი გავლენა მოახდინა, რის შედეგადაც მოქმედი ტარიფები და კომპანიების მიერ დაწესებული საკომისიოები მათთვის აღარ არის მისაღები.
გაფიცულები ტაქსის კომპანიებს საკომისიოს შემცირებასა და მგზავრობის ტარიფების გაზრდას სთხოვენ. მათი განმარტებით, აღნიშნული ცვლილებები აუცილებელია, რათა საქმიანობა კვლავ ეკონომიკურად გამართლებული გახდეს და მათ ყოველდღიური ხარჯების დაფარვა შეძლონ.
ბათუმის პარალელურად, ანალოგიური მოთხოვნებით ტაქსის მძღოლები გაიფიცნენ თბილისსა და ქუთაისშიც.
პროფკავშირ „ლაბორის“ ინფორმაციით, მძღოლების მიერ ჩამოყალიბებული მოთხოვნები სოციალური დიალოგის ფარგლებში მოლაპარაკებების გზით გადაწყვეტას ითვალისწინებს. ისინი მიმართავენ ტაქსის კომპანიებს დაიწყონ მოლაპარაკებები და გაითვალისწინონ მძღოლების სოციალური მდგომარეობა. ამასთან, მძღოლები პროცესში ჯანდაცვის სამინისტროსა და საქართველოს სახალხო დამცველის ჩართვასაც ითხოვენ.
„ვიტოვებთ იმედს, რომ სოციალური პრობლემების მოლაპარაკებების გზით გადაჭრა ჩვენს ქვეყანაში შესაძლებელია და სოციალური დიალოგის დამკვიდრების დროა,“ – აღნიშნულია პროფკავშირ „ლაბორის“ მიერ გავრცელებულ განცხადებაში.
დაკავშირებული თემები ⇓
ბათუმში ტაქსის მძღოლებმა საპროტესტო აქცია გამართეს
მატარებლის ბათუმში ჩამოსვლამდე მუნიციპალური ავტობუსი მუშაობას ასრულებს – რას ამბობენ ავტოტრანსპორტში
მანქანით ჩარჩენილი ადამიანი მდინარე ჭოროხში – მახოს ხიდის მიმდებარედ სამაშველო ოპერაცია მიმდინარეობს
