შინაგან საქმეთა სამინისტროს ინფორმაციით, საერთაშორისო ნარკოტრეფიკის ფაქტი გამოავლინეს. უწყების ცნობით, ამოიღეს განსაკუთრებით დიდი ოდენობით – დაახლოებით 103 კილოგრამი ნარკოტიკული საშუალება „მეტამფეტამინი“, რომლის სავარაუდო ღირებულება ე.წ. შავ ბაზარზე დაახლოებით 30 მილიონ ლარს შეადგენს.
გამოძიებით დადგინდა, რომ ერთ-ერთი კომპანიის კუთვნილი სატვირთო ავტომობილი, რომელიც კაუსტიკური სოდით იყო დატვირთული, საქართველოში მეზობელი ქვეყნიდან შემოვიდა და მესამე ქვეყანაში გადაადგილდებოდა. ტვირთის დეტალური დათვალიერებისას, ტომრებში გადანაწილებული ნარკოტიკული ნივთიერება აღმოაჩინეს.
განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და ქვეყანაში უკანონოდ შემოტანის ფაქტზე ერთი პირია დაკავებული. შსს-ს ინფორმაციით, საქმეზე გრძელდება ინტენსიური საგამოძიებო მოქმედებები დანაშაულში ჩართული სხვა პირების დადგენის მიზნით.
გამოძიება საქართველოს სისხლის სამართლის კოდექსის 260-ე და 262-ე მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.
