სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა განსაკუთრებით დიდი ოდენობით ქრთამის აღების ფაქტზე სახელმწიფო უსაფრთხოების სამსახურის უფროსის ყოფილი მოადგილე, ლევან ახობაძე დააკავეს. ინფორმაცია სუს-ში გამართულ ბრიფინგზე გახდა ცნობილი.
უწყების ცნობით, გამოძიება საქართველოს სისხლის სამართლის კოდექსის 338-ე მუხლის მესამე ნაწილის „ე“ ქვეპუნქტით მიმდინარეობს, რაც სასჯელის სახედ 11-დან 15 წლამდე თავისუფლების აღკვეთას ითვალისწინებს.
გამოძიების ინფორმაციით, 2024 წლის აპრილში, როდესაც ლევან ახობაძე სახელმწიფო უსაფრთხოების სამსახურის უფროსის მოადგილის თანამდებობას იკავებდა, მისთვის ცნობილი გახდა, რომ ერთ-ერთ კერძო მეწარმეს საქართველო-რუსეთის საზღვარზე, ლარსის საბაჟო-გამშვებ პუნქტზე, არადეკლარირებული 40 მილიონი რუსული რუბლი ჩამოერთვა, რაც ეროვნული ბანკის კურსით დაახლოებით 1 164 000 ლარს შეადგენდა.
სუს-ის განცხადებით, მეწარმემ თანხის დაბრუნების მიზნით შესაბამის უწყებებს კანონით დადგენილი წესით მიმართა, თუმცა უარი მიიღო. ამის შემდეგ, გამოძიების ვერსიით, ლევან ახობაძე შუამავლების მეშვეობით დაუკავშირდა მას და თანხის დაბრუნებაში დახმარებას დაჰპირდა.
ბრიფინგზე ითქვა, რომ მოლაპარაკებების შედეგად, კანონით გათვალისწინებული 10%-იანი ჯარიმის გადახდის შემდეგ, მეწარმემ 2024 წლის 30 აპრილს ჩამორთმეული თანხა დაიბრუნა. მოგვიანებით კი, სუს-ის ყოფილი მაღალჩინოსანი, შუამავლების საშუალებით, დახმარების სანაცვლოდ 500 000 ლარის ოდენობით ქრთამს ითხოვდა.
უწყების ცნობით, ერთ-ერთი მოწმის ჩვენების თანახმად, სუს-ის იმჟამინდელი უფროსის, გრიგოლ ლილუაშვილი ჩარევის შემდეგ მოთხოვნილი თანხა 250 000 ლარამდე შემცირდა. გამოძიების ინფორმაციით, აღნიშნული თანხა შუამავალს გადაეცა, ხოლო მოგვიანებით იმავე დღეს ლევან ახობაძეს მის სამუშაო ოთახში მიაწოდეს.
სახელმწიფო უსაფრთხოების სამსახურში აცხადებენ, რომ გამოძიება გრძელდება დანაშაულში მონაწილე სხვა პირების გამოვლენისა და დამატებითი მტკიცებულებების მოპოვების მიზნით.
სუს-ის ყოფილი უფროსი გრიგოლ ლილუაშვილი დააკავეს
