ბათუმის საკრებულო დღევანდელ სხდომაზე განიხილავს განკარგულების პროექტს, რომელიც მუნიციპალიტეტის საკუთრებაში არსებული პლაჟის მონაკვეთების აუქციონის წესით სარგებლობაში გადაცემისთვის საწყისი წლიური საფასურის განსაზღვრას ითვალისწინებს.
დოკუმენტის მიხედვით, ბათუმის მერიაში სხვადასხვა ლოკაციაზე არსებული პლაჟის მონაკვეთების სარგებლობაში გადაცემასთან დაკავშირებით განცხადებები შევიდა, რის გამოც საჭირო გახდა თითოეული მიწის ნაკვეთის საწყისი წლიური სარგებლობის საფასურის განსაზღვრა.
პროექტი ეხება გონიო-კვარიათის, გონიოს, მახინჯაურისა და მწვანე კონცხის ტერიტორიებზე მდებარე მიწის ნაკვეთებს. ღირებულებები განსაზღვრულია სსიპ ლევან სამხარაულის სახელობის სასამართლო ექსპერტიზის ეროვნული ბიუროს დასკვნების საფუძველზე.
დოკუმენტის თანახმად, გონიო-კვარიათისა და გონიოს ტერიტორიაზე მდებარე პლაჟის რამდენიმე მონაკვეთის შემთხვევაში, 1 კვადრატული მეტრის საწყისი წლიური სარგებლობის საფასური 46 ლარით განისაზღვრება.
მახინჯაურის ტერიტორიაზე მდებარე პლაჟების ნაწილზე საწყისი საფასური 45 ლარი იქნება, ხოლო მწვანე კონცხში მდებარე პლაჟის მონაკვეთის შემთხვევაში 55 ლარი 1 კვადრატულ მეტრზე.
განმარტებითი ბარათის მიხედვით, პროექტის განხორციელება დამატებით ფინანსურ ხარჯებს არ საჭიროებს, თუმცა მუნიციპალიტეტის ბიუჯეტის საშემოსავლო ნაწილზე დადებით გავლენას მოახდენს, რადგან აუქციონში გამარჯვებული პირები სარგებლობის საფასურს ბათუმის ბიუჯეტში გადაიხდიან.
დაკავშირებული თემები ⇓
კვარიათში პლაჟი დააბეტონეს – სად მიდის სამანქანე გზა
სანაპირო ელიტის ხელში – როგორ შეცვალა ბათუმის საკრებულომ სამშენებლო წესები ბიზნესმენების სასარგებლოდ
ქობულეთის სანაპიროზე ფიჭვების გაჩეხვის გამო არავინ დაჯარიმებულა – უწყებებს მოკვლევაც არ დაუწყიათ
