2026 წლის 4 მარტს მიღებული კანონი, რომლის მიხედვითაც ბიზნესს პოლიტიკური აქტივობა ეკრძალება, საკონსტიტუციო სასამართლოში გასაჩივრდა. სასამართლოს კანცელარიაში სარჩელი დღეს „რეფორმერ ფიტნესის“ მფლობელმა გიორგი ფუტკარაძემ დაარეგისტრირა. მისი ინტერესების დაცვას სასამართლოში ორგანიზაცია „თავისუფალ ბიზნესთა ასოციაცია“ უზრუნველყოფს.
ორგანიზაციის განცხადებით, ბიზნესს უნდა ჰქონდეს შესაძლებლობა, თავისუფლად გამოხატოს საკუთარი პოზიცია, დაიცვას საკუთარი ინტერესები და მონაწილეობა მიიღოს საზოგადოებრივ დისკუსიებში ყოველგვარი ზეწოლისა და შეზღუდვის გარეშე.
„თავისუფალ ბიზნესთა ასოციაციაში“ მიიჩნევენ, რომ აღნიშნული სამართლებრივი დავა მხოლოდ ერთი კომპანიის ინტერესს არ ეხება და მნიშვნელოვან გავლენას მოახდენს მთლიან კერძო სექტორზე, რადგან საკითხი უკავშირდება იმ ფუნდამენტურ პრინციპებს, რომლებზეც თავისუფალი და კონკურენტული ეკონომიკური გარემოა დაფუძნებული.
გიორგი ფუტკარაძის განცხადებით, ბიზნესი ქვეყნის ეკონომიკის ერთ-ერთი მთავარი საყრდენია და მხოლოდ მოგებაზე ორიენტირებული საქმიანობით არ უნდა შემოიფარგლებოდეს.
მისი თქმით, გამოხატვის თავისუფლებისა და სოციალური პასუხისმგებლობის ფარგლებში ბიზნესს უნდა შეეძლოს მონაწილეობა დემოკრატიულ პროცესებში, საკუთარი პოზიციის დაფიქსირება, ხელისუფლების კრიტიკა და ქვეყანაში მიმდინარე სოციალურ-ეკონომიკურ თუ პოლიტიკურ მოვლენებზე რეაგირება.
ფუტკარაძე ასევე აცხადებს, რომ საკანონმდებლო ცვლილებების ბუნდოვანი ინტერპრეტაცია და, მისი შეფასებით, ლეგიტიმური მიზნის დაუსაბუთებლობა სამართალდამცავ სისტემას აძლევს შესაძლებლობას, მეწარმე სუბიექტების მიმართ შერჩევითად გამოიყენოს სანქციები, რაც უარყოფითად აისახება როგორც კონსტიტუციით დაცულ უფლებებზე, ისე ბიზნესგარემოზე.
მისივე თქმით, სწორედ ამ მიზეზით მიიღო გადაწყვეტილება, სადავო ნორმების კონსტიტუციურობა საკონსტიტუციო სასამართლოში გაასაჩივროს და მათი გაუქმება მოითხოვოს.
„რა დროც არ უნდა დასჭირდეს სარჩელის განხილვას და როგორიც არ უნდა იყოს სასამართლოს გადაწყვეტილება, თვითცენზურას არ მივმართავ. თუმცა მნიშვნელოვანია, საკონსტიტუციო სასამართლომ აღნიშნულ საკითხზე სამართლებრივი პოზიცია დააფიქსიროს“, – აცხადებს გიორგი ფუტკარაძე.
