„დინამო ბათუმმა“ სპორტული დირექტორის თანამდებობაზე ჰაიკ ჰოვაკიმიანი დანიშნა. ინფორმაცია ამის შესახებ თავად კლუბმა გაავრცელა.
„დინამო ბათუმის“ სპორტული დირექტორი ჰაიკ ჰოვაკიმიანი იქნება მაღალი კვალიფიკაციის საფეხბურთო ფუნქციონერი, რომელსაც ევროპულ და საერთაშორისო დონეზე მუშაობის მრავალწლიანი გამოცდილება აქვს,“ – წერია განცხადებაში.
„თოლიების“ განმარტებით, ჰოვაკიმიანი აღმასრულებელ დონეზე კლუბის მართვას ითავებს. მის მოვალეობებში შევა კლუბის ერთიანი სპორტული სტრატეგიის შემუშავება და დანერგვა, სატრანსფერო პოლიტიკის ეფექტიანი მართვა, ასევე მთავარი გუნდის, „დინამოს“ აკადემიისა და სკაუტინგის კოორდინაცია.
„დინამო ბათუმში“ მუშაობის დაწყება ჩემთვის ახალი, ძალიან საინტერესო გამოწვევაა. კლუბის ხელმძღვანელობასთან ხანგრძლივი კონსულტაციების შემდეგ სრულად დავრწმუნდი ამ პროექტის ამბიციურობაში და მჯერა, რომ მის განვითარებაში ჩემი წვლილის შეტანა შემიძლია. მაქვს მკაფიო ხედვა, რომელიც სრულ თანხვედრაშია კლუბის ამჟამინდელ მიზნებთან. მზად ვარ, მაქსიმალურად გამოვიყენო ჩემი გამოცდილება და პროფესიული კავშირები, რათა „დინამომ“ რაც შეიძლება სწრაფად მიაღწიოს იმ ნანატრ წარმატებას, რომელსაც ეს ქალაქი და გულშემატკივრები იმსახურებენ,“ – განაცხადა ჰოვაკიმიანმა „დინამო ბათუმთან“ ინტერვიუში.
„დინამო ბათუმში“ დანიშვნამდე ჰოვაკიმიანი სპორტული დირექტორის პოზიციაზე სომხურ „ნოასა“ და უნგრულ „დებრეცენში“ მუშაობდა. „ნოასთან“ ერთად ის ორჯერ გახდა სომხეთის ვიცე-ჩემპიონი, თასისა და სუპერთასის მფლობელი. „ნოა“ ასევე წარმატებით ასპარეზობდა ევროტურნირებზე. რაც შეეხება უნგრულ „დებრეცენს“, ჰოვაკიმიანთან ერთად გუნდი უნგრეთის ჩემპიონატის მესამეადგილოსანი გახდა და კონფერენს ლიგის საკვალიფიკაციო ეტაპზე იასპარეზა.
„დინამო ბათუმის“ სპორტული დირექტორის პოზიციაზე ჰაიკ ჰოვაკიმიანის შერჩევა მკაფიო სტრატეგიულ მიზანს ემსახურება. ამ ახალგაზრდა და ამბიციურმა საფეხბურთო მენეჯერმა სამშობლოში, „ნოასთან“ ერთად, წარმატებით განვლო განვითარების ის გზა, რომელსაც ჩვენ ახლა ვიწყებთ. თუ ამას „დებრეცენში“ მუშაობის წარმატებულ გამოცდილებასაც დავუმატებთ, აბსოლუტურად დარწმუნებული ვარ, რომ მისი პროფესიონალიზმი ჩვენს პროექტს მნიშვნელოვნად გააძლიერებს,“ – აღნიშნა „დინამო ბათუმის“ მფლობელმა თემურ მიქელაძემ.
ავტორი: დიმიტრი გორგილაძე
