ბათუმის ინკლუზიური დასი “ცვლილებები თანაბარი უფლებებისთვის” მერს, არჩილ ჩიქოვანს მიმართავს. საქმე უწყების მიერ გამოცხადებულ ტენდერს ეხება, რომელშიც დასის აზრით, გამოუცდელმა მონაწილემ გაიმარჯვა, შედეგად მათი არსებობა საფრთხის ქვეშ დადგა.
ორგანიზაციის წარმომადგენლებმა დღეს პრესკონფერენცია გამართეს და საქმის ირგვლივ ისაუბრეს. აღნიშნეს, რომ იმ შემთხვევაში თუ ბათუმის მერია გადაწყვეტილებას არ შეცვლის უწყების სატენდერო კომისიას სასამართლოში უჩივლებენ.
“ინკლუზიური დასისთვის განკუთვნილი ბიუჯეტი, რომელიც გამოყოფილი იყო მერიის მხრიდან დღეისათვის არის საფრთხის წინაშე. კერძოდ, აღნიშნული თანხა ტენდერზე გავიდა და დაბალი ფასის მქონე პრეტენდენტმა გაიმარჯვა, რომელიც არის არაკვალიფიციური. ორგანიზაციას დოკუმენტაციაც ხარვეზებით აქვს წარდგენილი. ის ვერ აკმაყოფილებს სატენდერო მოთხოვნებს, თუმცა გამარჯვებულად დასახელდა. ამ გარემოებებზე კი სატენდერო კომისიას თვალი აქვს დახუჭული. ჩვენ ძალიან კარგი შედეგები გვქონდა, არაჩვეულებრივი დასი ჩამოყალიბდა, საერთაშორისო დონეზეც კი სხვებს კონკურენციას ვუწევდით. ჩვენ ღია წერილით მივმართავთ ბათუმის მერს. არჩილ ჩიქოვანისგან ვითხოვთ განმარტებებს. ვითხოვთ გამარჯვებული კომპანიის ხარვეზებზე ახსნა განმარტება, მათ შორის ხელშეკრულების გაბათილებას ვითხოვთ,” – აღნიშნა პრესკონფერენციაზე ნატალია გალოგრემ, რომელიც ინკლუზიური დასის ხელმძღვანელია.
რატომ გაიტანა დასის დაფინანსების საკითხი ბათუმის მერიამ ტენდერზე, ასევე, რატომ გაიმარჯვა ხარვეზების მქონე კომპანიამ ტენდერში – ნატალია გალოგრემ შესაძლო გარემო ფაქტორებზეც ისაუბრა. კერძოდ, ინკლუზიური დასის ხელმძღვანელი ვარაუდობს, რომ რუსული კანონის საწინააღმდეგო აქციებში მონაწილეობის გამო მერიამ ისინი დასაჯა. ნატალია გალოგრეს თქმით, ყველგან და ყოველთვის პროევროპულ პოზიციას აფიქსირებს, რაც შესაძლოა ხელისუფლებისთვის მიუღებელი აღმოჩნდა.
“დაბეჯითებით ამაზე ვერ ვისაუბრებ, თუმცა გარემოებები ამის თქმის საფუძველს მაძლევს. გაუგებარია რატომ გაიმაჯრვა იმ კომპანიამ, რომელსაც ყველამ მხრივ დარღვევები აქვს, მათ შორის გამოცდილების არმქონეა. ფაქტი სახეზეა, შესაძლოა ეს უკავშირდებოდეს პოლიტიკურ განწყობებს, სხვა შემთხვევაში ჩვენი დასი დაკისრებულ მოვალეობას მაღალპროფესიულად ასრულებდა და ამ მხრივ პრეტენზიები არ არსებობდა” – აღნიშნა ნატალია გალოგრემ.
ინფორმაციისთვის: ინკლუზიური დასი 2019 წლიდან მოქმედებს და ამ დრომდე 10-მდე წარმოდგენა აქვთ დადგმული.
ორგანიზაცია “ცვლილებები თანაბარი უფლებებისთვის” პრესკონფერენციას მერიაში არ უპასუხეს.
