სამართალდამცავებმა „ერთიანობა – ნაციონალური მოძრაობის“ ავტომობილები უკანონოდ შსს-ს საჯარიმო ტერიტორიაზე გადაიყვანეს, ამის შესახებ პარტიის წევრებმა ბრიფინგზე განაცხადეს. ისინი საქართველოს შინაგან საქმეთა სამინისტროს მიმართავენ და კუთვნილი მანქანების დაბრუნებას ითხოვენ.
„აგონიაში მყოფი „ქართული ოცნება“ ყველა ბინძური მეთოდის გამოყენებით ცდილობს, ხელი შეუშალოს „ერთიანობა – ნაციონალურ მოძრაობის“ გამარჯვების კამპანიას.გუშინ, როდის ხელვაჩაურის შტაბის წევრები გასული იყვნენ სააგიტაციო მასალის გასაკრავად და დასარიგებლად, ადგილზე მისულებს შსს-ს სხვადასხვა ქვედანაყოფები დახვდათ. ყოველგვარი მიზეზის, ახსნის გარეშე ჩვენი ავტომობილების უკანონო დაპატიმრება მოახდინეს. დალუქვის გარეშე ავტომობილი შსს-ს ავტოსადგომზე გადაიყვანეს. მოვითხოვთ, საქართველოს შინაგან საქმეთა სამინისტროსგან, რომ ავტომობილები დაგვიბრუნოს. ასევე, ჩვენ გვაქვს ძალიან მძიმე გამოცდილება, როდესაც მსგავსად ავტომობილების გადაყვანა ხდება, აღმოაჩენენ ხოლმე სხვადასხვა რაღაცებს“, – განაცხადა ნიკა ქაშიბაძემ ბრიფინგზე.
ოპოზიციის ბრიფინგს “ქართული ოცნების” დელეგატი სოციალური ქსელის მეშვეობით გამოეხმაურა. მინდია დიასამიძე ოპონენტებს ტყუილში ადანაშაულებს.
“გუშინ, ხელვაჩაურში ნაციონალური მოძრაობის წევრები და მათი აქტივი, მოძრაობდა ავტომობილით და ჩვენი „ქართული ოცნების“ ბანერებს აზიანებდა, რაც სისხლის სამართლის დანაშაულია! პოლიციაში გამოძიება დაუწყებულია და მას ავტომობილი ჩამოართვეს. ახლა არ იცით რაზე აპირებენ განცხადების გაკეთებას? – ავტომანქანა წაგვართვეს, საარჩევნო კამპანიაში ხელს გვიშლიანო. სერიოზულად ვამბობ, სულ გაგიჟდნენ მგონი,” – დაწერა ფეისბუქზე “ოცნების” დელეგატმა.
