წლებია ქობულეთის ათეულობით სოფელი სასმელი წყლის გარეშეა, ამ დროს კი მუნიციპალიტეტის მერია წინასაარჩევნოდ მოსახლეობას ფარშევანგების ვოლიერს უშენებს.
ტურისტული ქალაქის ცენტრალურ პარკში რკინის კონსტრუქციის მონტაჟი ცოტა ხნის წინ დასრულდა, თუმცა არავინ იცის გალიებში ფარშევანგებს როდის გამოკეტავენ. მერიაში “აჭარა თაიმს” უთხრეს, რომ წელს მხოლოდ ვოლიერის მშენებლობის ფული გააჩნდათ, ხოლო ფარშევანგების ყიდვას სამომავლოდ აპირებენ.
„მაშინ, როდესაც ქობულეთის მუნიციპალიტეტში არაერთი პრობლემაა, მაგალითად მოსახლეობა ებრძვის გაზიფიცირების პრობლემას, მათ არ აქვთ სასმელი წყალი და ინფრასტრუქტურა მოუწესრიგებელია ამ დროს ხელისუფლება დასცინის ადამიანებს წინასაარჩევნოდ. ეს ადგილობრივების შეურაცხყოფაა,“ – ამბობს ჩვენთან საუბრისას ერთ-ერთი ადგილობრივი თედო ზოიძე.
ვისი სურვილით ან მოთხვნით შენდება ფარშევანგის ვოლიერები და რამდენი დაიხარჯა პროექტისთვის? კითხვებზე ქობულეთის მერიაში არ გვიპასუხეს.
“დიდი გალია გვჭირდება ჩვენ, რომ ამ პირობებში ვცხოვრობთ. ასე ტურისტები უფრო კარგად ნახავენ რა ექსპონატებიც ვართ. ეს ვოლიერი ალბათ ჩემს სოფელში ბუნებრივი აირის დაზიანებული და ჩამოყრილი მილებით გააკეთეს. იმდენი პრობლემა და საჭიროება გვაქვს, გადარჩენისთვის ვიბრძვით და მერია დაგვცინის, ვოლიერს გვიშენებს. ალბათ ივანიშვილს გამოექცა ფარშევანგები ზოოპარკიდან და აჰა იყოს ქობულეთში ნახავენო. წინ მნიშვნელოვანი არჩევნები გვაქვს, კარგი თემები გვეძლევა სამჯელოდ რომ მარტივად დავფიქრდეთ და მივიღოთ გადაწყვეტილება,” – თქვა ჩვენთან საუბრისას ნიგო ცეზარიშვილმა.
[embedyt] https://www.youtube.com/watch?v=lYR847_nqCo[/embedyt]
